იტალიის პრემიერ -მინისტრმა სილვიო ბერლუსკონიმ უარყო გავრცელებული ინფორმაცია, რომ მთავარ პოლიტიკურ მოკავშირეს, ”ჩრდილოეთის ლიგის” ლიდერს უმბერტო ბოსის 2012 წლის მარტში ვადამდელი საპარლამენტო არჩევნების დანიშვნაზე შეუთანხმდა. მომდევნო საპარლამენტო არჩევნები იტალიაში 2013 წელს უნდა ჩატარდეს. იტალიური ოპოზიციური გაზეთის La Repubblica -ს ცნობით კი, ბერლუსკონიმ დადო პირობა, რომ თანამდებობიდან მიმდინარე წლის დეკემბერში ან მომავალი წლის იანვარში წავა და ამის სანაცვლოდ უმბერტო ბოსის მოსთხოვა დათანხმებულიყო საპენსიო ასაკის 67-წლამდე გაზრდას. ეს ბერლუსკონის ერთ-ერთ ანტიკრიზისულ ღონისძიებად მიაჩნია, თუმცა გაზეთის ცნობით, ”ჩრდილოეთის ლიგის” ლიდერმა პრემიერ-მინისტრის წინადადება არ გაიზიარა.
