სახელმწიფო უსაფრთხოების სამსახურის თქმით, ბაჩო ახალაიას მიერ სასამართლო სხდომაზე გაკეთებული განცხადება "არის ცალსახა ტყუილი და ემსახურება სიმართლის იმგვარად დამახინჯებას, რომ საზოგადოებას რეალობის საპირისპირო წარმოდგენა ჰქონდეს საგამოძიებო ორგანოში განვითარებულ მოვლენებზე." ამის შესახებ სუს-მა "ინტერპრესნიუსს" განუცხადა.
"სინამდვილეში, ჩვენმა თანამშრომლებმა, დაკავების შემდეგ, ახალაიას პირველივე კითხვა დაუსვეს - მხოლოდ მას ჰქონდა სატელეფონო ინტერნეტკონტაქტი ზოდელავასთან, ბურჭულაძესთან და სხვებთან, თუ მის მეუღლე ანნა ნადარეიშვილსაც. ბაჩანა ახალაიას იქვე, მოპოვებული უტყუარი მონაცემების შესახებ დეტალური ახსნის პარალელურად განემარტა, რომ დანაშაულის აღიარება-არაღიარების მიუხედავად თუ ის მხოლოდ საკუთარ ინტერნეტკონტაქტს დაადასტურებდა, მის მეუღლეს გაცილებით მაღალი ალბათობით გამოერიცხებოდა პასუხისმგებლობის სამართლებრივი რისკი. მიუხედავად ამისა, მან ჩვენების მიცემაზე და ხსენებულ კითხვაზე პასუხის გაცემაზე განაცხადა უარი, რის შემდეგაც, პროკურატურასთან კონსულტაციის შედეგად, მიღებული იქნა გადაწყვეტილება, ანნა ნადარეიშვილი მაინც გათავისუფლებულიყო დაკავებიდან და გამოძიებას მომავალში ემსჯელა მისი პასუხისმგებლობის საკითხთან დაკავშირებით.
ახალაიას მიერ დღეს გაკეთებული განცხადება, განსაკუთრებით მისი ზემოთ ხსენებული გადაწყვეტილების ფონზე, საგამოძიებო ორგანოს წარმომადგენელთა მაღალი სამართლებრივი და მორალური სტანდარტით მოქმედება მუქარად წარმოაჩინოს, მხოლოდ მის პიროვნულ მახასიათებლებზე მეტყველებს, რაც ასევე მნიშვნელოვანია სისხლის სამართალწარმოების პროცესში." - თქვეს სუს-ში.
თბილისის საქალაქო სასამართლოში დღეს ბაჩო ახალაიას პროცესი ჩატარდა. მას სხდომაზე თქვა, რომ "სუს-ის შენობაში მკაფიოდ მითხრეს, ან ახლა შენს ცოლს დავიჭერთ, ან სხვა დაკავებულებს ყველას, მანჯგალაძე, ბურჭულაძე... ყველას ამხელთ ძალადობაში... ეს რასაც ვყვები ეხება დახურვას, თქვენ თუ პროცესს დახურავთ, როცა მეუბნებიან რომ თქვენს ცოლს დავიჭერთ 13 წლის ბავშვს დაგიტოვებთ ობლად, თქვენ ფიქრობთ, რომ ამ ნიუანსის საქმე უნდა დაიხუროს?"
ბაჩო ახალაიას 4 ოქტომბრის საქმეზე აღკვეთის ღონისძიების სახით მოსამართლემ პატიმრობა შეუფარდა.
