ივანიშვილის წარმომადგენელი შალვა პაპუაშვილი გერმანიის ელჩის, პეტერ ფიშერის რუსთაველის გამზირზე მისვლასთან დაკავშირებით ამბობს, რომ ფიშერი მასხრად იგდებს ქართულ სახელმწიფოს, ქართულ საზოგადოებას, ყველაფერს, რაც კი დაკავშირებულია დიპლომატიასთან.
"საზოგადოებამ კი არა, მე როგორ შევხედო, ის ვეღარ გამიგია. აბსოლუტურად აღმაშფოთებელია, ეს ადამიანი მასხრად იგდებს ქართულ სახელმწიფოს, ქართულ საზოგადოებას, ყველაფერს, რაც კი დაკავშირებულია დიპლომატიასთან.
[...] ახლა მე პირადად ველოდები, რა ნაბიჯებს გადადგამს გერმანიის საგარეო საქმეთა სამინისტრო, რადგან, ეს ადამიანი, ფაქტია, რომ მასხრად იგდებს ქართულ სახელმწიფოს.
მამუკა ცუცქირიძე, ადამიანი ჩვეულებრივად ლანძღავს ეკლესიას, პატრიარქს, მოსაყდრეს, მოიხსენიებს ეგზარქოსებად, ამ ადამიანთან იღებს ფოტოს და უცხადებს სოლიდარობას.
ამიტომ, გერმანიის საგარეო საქმეთა სამინისტრო ახლა უნდა ჩამოყალიბდეს, ბოლოსდაბოლოს, რა უნდათ მათ. კონსულტაციიდან დაბრუნების შემდეგ გვქონდა იმედი, რომ გერმანიის ელჩი გააცნობიერებდა ვენის კონვენციის მნისვნელობას, გადაიკითხავდა კიდევ ერთხელ შესაბამის მუხლებს და ამ ყველაფრის შემდეგ თავს მაინც შეიკავებდა. არ გასულა რამდენიმე დღე და უკვე მასხრად აგვიგდო მთელი საზოგადოება..." - ამბობს შალვა პაპუაშვილი.
პაპუაშვილი გერმანიის საგარეო უწყებას მოუწოდებს, "ჩამოყალიბდეს", რა სურს მას, "ქართველ ხალხთან ხიდების გადება, თუ ამ ხიდების დაწვა".
"როდესაც გერმანიის საგარეო საქმეთა სამინისტრო აბრუნებდა ელჩ ფიშერს, მათ ჰქონდათ წინასწარი კონსულტაცია საქართველოს საგარეო საქმეთა სამინისტროსთან. მათ განუცხადეს საგარეოს და დაჰპირდნენ, რომ გერმანიის ელჩი თავს შეიკავებდა იმგვარი ქმედებებისგან, რომლებსაც მანამდე ჰქონდა ადგილი" - თქვა პაპუაშვილმა.
გუშინ მოქალაქე მამუკა ცუცქირიძემ რუსთაველის გამზირიდან გამოაქვეყნა ფოტო გერმანიის ელჩ პეტერ ფიშერთან ერთად. ცუცქირიძე წერდა, რომ ელჩი პარლამენტთან მოულოდნელად მივიდა და სოლიდარობა გამოუცხადათ.
