10 ივლისს არაბთა გაერთიანებულ საამიროებში, აბუ-დაბიში აზერბაიჯანის პრეზიდენტ ილჰამ ალიევსა და სომხეთის პრემიერმინისტრ ნიკოლ ფაშინიანს შორის შეხვედრა გაიმართა.
აზერბაიჯანული მედია წერს, რომ შეხვედრაზე ლიდერებმა ორი ქვეყნის ურთიერთობების ნორმალიზაციის პროცესის სხვადასხვა ასპექტი განიხილეს.
როგორც Azernews-ი აზერბაიჯანის საგარეო საქმეთა სამინისტროზე დაყრდნობით იუწყება, ორივე მხარემ დაადასტურა, რომ პირდაპირი ორმხრივი მოლაპარაკებები ნორმალიზაციასთან დაკავშირებული გადაუჭრელი საკითხების მოსაგვარებლად ყველაზე ეფექტურ ფორმატად რჩება. მხარეები შეთანხმდნენ, რომ შედეგებზე ორიენტირებული დიალოგი მომავალშიც გაგრძელდება.
მხარეებმა ასევე საზღვრის დელიმიტაციის პროცესში მიღწეული პროგრესი განიხილეს და შესაბამის სახელმწიფო კომისიებს ამ მიმართულებით პრაქტიკული მუშაობის გაგრძელება დაავალეს.
დამატებით, მხარეები ორმხრივი მოლაპარაკებებისა და ნდობის განმტკიცებისკენ მიმართული ზომების გაგრძელებაზე შეთანხმდნენ, რაც მიზნად თანამშრომლობის გაღრმავებას ისახავს.
ცნობისთვის, მანამდე აშშ-ს სახელმწიფო მდივანმა, მარკო რუბიომ მიუთითა, რომ "საკმაოდ მალე" აზერბაიჯანსა და სომხეთს შორის შესაძლოა, სამშვიდობო ხელშეკრულება დაიდოს.
ამის შესახებ რუბიომ ოვალურ კაბინეტში გამართული შეხვედრის დროს დონალდ ტრამპის კითხვის პასუხად ადმინისტრაციის საგარეო მიღწევების ჩამოთვლისას თქვა.
"თქვენი ლიდერობის დროს შევაჩერეთ და დავასრულეთ ომი ინდოეთსა და პაკისტანს შორის, NATO[-ს თავდაცვის დაფინანსება] 5%-ზეა პირველად, ყველაზე მაღალ მაჩვენებელზეა, სამშვიდობო ხელშეკრულება კონგოს დემოკრატიულ რესპუბლიკასა და რუანდას შორის, 12-დღიანი ომი, რომელიც ამერიკული ოპერაციით დასრულდა და ერთადერთი ქვეყანა ვართ მსოფლიოში, რომელიც ამის გაკეთებას შეძლებდა.
იმედია, საკმაოდ მალე სამშვიდობო ხელშეკრულება აზერბაიჯანსა და სომხეთს შორის. ახლა არსებობს პოტენციალი, რომ მთლიანად ახლო აღმოსავლეთი და მისი ინფრასტრუქტურა შეიცვალოს სირიისა და ლიბანის გამო. ჯერ კიდევ ექვსი თვეც არ გასულა, ასე რომ ეს პირდაპირ მეტყველებს თქვენს ლიდერობაზე". - თქვა რუბიომ.
მიმდინარე წლის 13 მარტს, მას შემდეგ, რაც აზერბაიჯანის საგარეო საქმეთა მინისტრმა, ჯეიჰუნ ბაირამოვმა განაცხადა, რომ ერევანმა სამშვიდობო შეთანხმების ბოლო ორი პირობა მიიღო, სომხეთის საგარეო საქმეთა სამინისტრომ ამ ფაქტის დამადასტურებელი განცხადება გაავრცელა.
სომხეთის რესპუბლიკის საგარეო საქმეთა სამინისტრო ადასტურებს, რომ "სომხეთის რესპუბლიკასა და აზერბაიჯანის რესპუბლიკას შორის მშვიდობისა და სახელმწიფოთაშორისი ურთიერთობების დამყარების შეთანხმების" სამუშაო ვერსიაზე თანხმობა მიღწეულია და რომ შეთანხმებაზე მოლაპარაკებები დასრულებულია.
შესაბამისად, სამშვიდობო შეთანხმება ხელმოსაწერად მზადაა. სომხეთის რესპუბლიკა მზადაა დაიწყოს კონსულტაციები აზერბაიჯანის რესპუბლიკასთან შეთანხმების ხელმოწერის დროსა და ლოკაციაზე." - ნათქვამია განცხადებაში.
