პოლონეთის NATO-ს ბაზიდან აფრენილმა ბრიტანულმა ავიაგამანადგურებლებმა, ბალტიის ზღვის თავზე ორ რუსულ მზვერავ თვითმფრინავს გზა გადაუჭრეს.
ამის შესახებ ინფორმაციას NATO-ს საჰაერო ძალების შტაბი ავრცელებს.
რუსული თვითმფრინავები კალინინგრადის ოლქიდან მოფრინავდნენ. რადარებზე გამოჩენისთანავე მალბორკის ბაზიდან ბრიტანული ავიაგამანადგურებლები აფრინდნენ.
"ორ რუსულ თვითმფრინავს Eurofighter Typhoon-ის ტიპის ავიაგამანადგურებლებმა გზა გადაუჭრეს". – წერია შტაბის განცხადებაში.
მზვერავი თვითმფრინავებისთვის გზის გადაჭრა ასევე დაადასტურა გაერთიანებული სამეფოს თავდაცვის სამინისტრომ.
ანგარიშის მიხედვით, რუსეთმა გამოიყენა AH-30 და ИЛ-20M ტიპის მზვერავები. თვითმფრინავები ფოტოს გადასაღები თანამედროვე აპარატურით არის აღჭურვილი.
