რუსული ავიაკომპანია РусЛайн ხანტი-მანსიისკიდან ოკუპირებულ სოხუმში პირდაპირ ფრენებს იწყებს. პირდაპირი საჰაერო მიმოსვლა 28 ივნისს გაიხსნება.
ინფორმაცია სოხუმის აეროპორტის Telegram არხზე ვრცელდება.
განცხადებაში აღნიშნულია, რომ რეისებს ორივე მიმართულებით ავიაკომპანია РусЛайн 50-ადგილიანი Bombardier CRJ200 ტიპის თვითმფრინავით განახორციელებს.
როგორც ТАСС-ს ხანტი-მანსიისკის აეროპორტში განუცხადეს, პირდაპირი რეისები კვირაში ორჯერ შესრულდება.
ТАСС აღნიშნავს, რომ მანამდე ხანტი-მანსიისკის ავტონომიური რეგიონის გუბერნატორმა, რუსლან კუხარუკმა დაავალა, შეესწავლათ ხანტი-მანსიისკის ავტონომიური ოლქიდან აფხაზეთში პირდაპირი რეისების განხორციელების შესაძლებლობა. ამ მიმართულების განვითარებისთვის რეგიონულ ბიუჯეტში შესაბამისი სუბსიდიაა გათვალისწინებული.
ცნობისთვის, 1 მაისს, 32 წლის შემდეგ მოსკოვიდან სოხუმში პირველი რეგულარული ავიარეისი შესრულდა - UVT Aero-ს ავიახაზების კომერციული თვითმფრინავი ვნუკოვოს საერთაშორისო აეროპორტიდან გაემგზავრა და სოხუმში ოკუპირებული აფხაზეთის პირველი დე ფაქტო პრეზიდენტის, ვლადისლავ არძინბას სახელობის აეროპორტში დაფრინდა.
