სამხრეთ კორეის ყოფილ პრეზიდენტს, მუნ ჯე ინს პროკურატურამ ქრთამის მიცემაზე ბრალი წაუყენა.
პროკურატურის მიხედვით, მუნი პრეზიდენტის თანამდებობაზე ყოფნის დროს ყოფილ სიძეს დაეხმარა, გამოცდილების გარეშე დაეწყო მუშაობა ერთ-ერთ ავიაკომპანიაში, სანაცვლოდ, ავიაკომპანიის CEO, პარლამენტის ყოფილი წევრი და ბიზნესმენი, ი სანგ ჯიკი სახელმწიფოს მიერ დაფინანსებული სააგენტოს ხელმძღვანელი გახდა.
2018-2020 წლებში, მუნის სიძემ ხელფასის სახით 217 მილიონი კორეული ვონი ($150 000) აიღო, რაც პროკურატურის მტკიცებით, პრეზიდენტ მუნისთვის განკუთვნილ ქრთამს წარმოადგენს.
2022 წელს ი სანგ ჯიკს სასამართლომ კომპანიის თანხის გაფლანგვისთვის 6 წლით პატიმრობა მიუსაჯა.
მუნ ჯე ინი სამხრეთ კორეის პრეზიდენტი 2017-2022 წლებში იყო. ის სამხრეთ კორეის მესამე პრეზიდენტია, რომელიც ჩრდილოეთ კორეაში ვიზიტით იმყოფებოდა. მის მმართველობასთან არის დაკავშირებული ჩრდილოეთ კორეასთან ურთიერთობის გამოსწორების არაერთი მცდელობა, მათ შორის, 2018-2019 წლებში აშშ-ს პრეზიდენტ დონალდ ტრამპსა და ჩრდილოეთ კორეის პრეზიდენტ კიმ ჩენ ინს შორის მოლაპარაკებები ბირთვულ განიარაღებაზე.
მუნი სამხრეთ კორეის ისტორიაში მე-9 პრეზიდენტია, რომლის წინააღმდეგაც გამოძიება დაიწყო. 4 ყოფილი პრეზიდენტი სასამართლომ დამნაშავედ სცნო, ხოლო სამხრეთ კორეის ბოლო არჩეული პრეზიდენტის, იუნ სოკ იოლის წინააღმდეგ სასამართლო პროცესები ამ დროისთვის მიმდინარეობს.
