მედიაში გავრცელებული ინფორმაციით, წითელ ზღვაში, ბაბ ელ-მანდების სრუტესთან მცურავ ბრიტანულ გემზე იემენელმა ჰუსიტებმა, სავარაუდოდ, სარაკეტო იერიში მიიტანეს. ამასთანავე, წითელი ზღვის რეგიონში უპილოტო საფრენი აპარატების მოქმედებების შესახებ ცნობებიც ვრცელდება.
გაერთიანებული სამეფოს საზღვაო სავაჭრო ოპერაციების სააგენტოს (UKMTO) განცხადებით, სამხედრო დრონების აქტიურობის წყარო იემენიდან მოდის და მიმდებარედ მცურავ ხომალდებს სააგენტო სიფრთხილისკენ მოუწოდებს.
ბრიტანული გამოცემა The Sun-ი საზღვაო უსაფრთხოების ფირმა Ambrey-ს ინფორმაციაზე დაყრდნობით წერს, რომ ბაჰამის დროშის ქვეშ მცურავ ბრიტანულ გემს რაკეტა მოხვდა. ისრაელური გამოცემა Ynet-ის თქმით, მომხდარი თავდასხმის შესახებ ცნობები ისრაელელმა ოფიციალურმა პირებმაც დაადასტურეს.
კომერციულ ხომალდზე განხორციელებული თავდასხმის შესახებ ცნობები წითელი ზღვის რეგიონში გაზრდილი დაძაბულობის ფონზე ვრცელდება. 19 ნოემბერს იემენში ირანიდან მართულმა ჰუსიტების შეიარაღებულმა დაჯგუფებამ განაცხადა, რომ ისრაელის დროშის ქვეშ მცურავი ან ისრაელური კომპანიის მფლობელობაში არსებული ნებისმიერი ხომალდი მათი სამიზნე გახდებოდა.
ამავე დღეს, იემენელმა ჰუსიტებმა სატვირთო გემი Galaxy Leader-ი გაიტაცეს. ისრაელის თავდაცვის ძალების მიერ გავრცელებული ცნობით, ის თურქეთიდან ინდოეთისკენ მიცურავდა. Reuters-ის მიხედვით, გატაცების დროს გემის ეკიპაჟი 25 წევრისგან შედგებოდა. გატაცებული სატვირთო ხომალდი ბრიტანული კომპანიის ქვეშ არის დარეგისტრირებული, რომლის წილსაც ისრაელელი მაგნატი აბრაამ უნგარი ფლობს. მიმდინარე ცნობებით, ამ დროისთვის გემის მართვა იაპონურ კომპანიას იჯარით აქვს აღებული. გემი ამ დრომდე იემენელი ჰუსიტების განკარგულებაშია.
26 ნოემბერს იემენის სანაპიროსთან კიდევ ერთი გემის გატაცების შესახებ ცნობები გავრცელდა. ადენის ყურეში გატაცებული ტანკერი ლიბერიის დროშის ქვეშ დაცურავდა და გემების მენეჯმენტის საერთაშორისო კომპანია Zodiac Maritime-ს ეკუთვნოდა. თუმცა, გემი მეორე დღესვე, აშშ-ს საზღვაო ძალების მოთხოვნის შემდეგ გაათავისუფლეს, ხოლო გამტაცებლები აშშ-ს საზღვაო ძალებმა დააკავეს.
იემენის საერთაშორისოდ აღიარებულმა მთავრობამ თავდასხმა ჰუსიტებს დააბრალა, თუმცა აჯანყებულებს, რომლებიც დედაქალაქ სანაას აკონტროლებენ, პასუხისმგებლობა ტანკერის გატაცებასა და სარაკეტო თავდასხმაზე არ აუღიათ.
იემენში "ჰუსიტები" ირანის მიერ მხარდაჭერილი შიიტური შეიარაღებული დაჯგუფებაა, რომელიც 1990-იან წლებში დაარსდა. ისინი იემენის მთავრობის წინააღმდეგ იბრძვიან და ქვეყანაზე სრული კონტროლის დამყარება სურთ. მათი გაცხადებული მიზანია ისრაელის, აშშ-სა და ებრაელების განადგურება. ჰუსიტები ჩართულნი იყვნენ 2011 წლის “არაბული გაზაფხულის” საპროტესტო აქციებში. 2014 წელს მათ იემენის დედაქალაქის დაკავება შეძლეს, 2015 წლიდან კი საუდის არაბეთის კოალიცია ჰუსიტი ამბოხებულების წინააღმდეგ კონფლიქტში ჩაერთო.
გაეროს თქმით, იემენში კონფლიქტმა მსოფლიოში ერთ-ერთი ყველაზე მწვავე ჰუმანიტარული კრიზისი გამოიწვია. კონფლიქტის დაწყებიდან დღემდე იემენში 377 000 ადამიანი გარდაიცვალა, აქედან 150 000 უშუალოდ სამხედრო მოქმედებებს ემსხვერპლა, 60% კი შიმშილმა, ასევე საჭირო ჯანდაცვისა და უსაფრთხო წყლის არარსებობამ იმსხვერპლა. ამას გარდა, 4.5 მილიონი ადამიანი იძულებით გადაადგილებულ პირად იქცა, ხოლო მოსახლეობის 80%-ს, ანუ 24.1 მილიონ ადამიანს, ჰუმანიტარული დახმარება ესაჭიროება.
