სააგენტო Reuters-ი ანონიმურ ამერიკელ სამხედრო ოფიციალურ პირზე დაყრდნობით წერს, რომ ერაყსა და ირანში აშშ-ს შეიარაღებულ ძალებს რაკეტებითა და დრონებით ხუთშაბათს, 23 ნოემბერს რამდენიმე საათის განმავლობაში ოთხჯერ დაესხნენ თავს, თუმცა მსხვერპლი არ ყოფილა და ინფრასტრუქტურა არ დაზიანებულა.
სააგენტოს ინფორმაციით, აშშ-სა და საერთაშორისო ძალებს თავს დაესხნენ ჩრდილო-აღმოსავლეთ სირიაში ორ ლოკაციაზე რამდენიმე რაკეტითა და დრონით.
ერაყში კი რამდენიმე დრონი გაუშვეს ბაღდადის დასავლეთით, აინ ალ-ასადის საავიაციო ბაზაზე და დრონი - ჩრდილოეთით, ერბილის აეროპორტის მახლობლად, ლოკაციებზე, სადაც აშშ-ს შეიარაღებული ძალები იყვნენ განთავსებული.
მომხდარზე პასუხისმგებლობა აიღო დაჯგუფება ისლამურმა წინააღმდეგობამ, რომელიც ანალიტიკოსების თქმით, ერაყში ირანის მოკავშირე შეიარაღებულ დაჯგუფებებს აერთიანებს.
თავდასხმები მას შემდეგ მოხდა, რაც აშშ-მ ბაღდადის სამხრეთით პროირანულ შეიარაღებულ დაჯგუფებას დაარტყა, რომლის შედეგადაც, დაჯგუფების ცნობით, დაჯგუფების რვა წევრი დაიღუპა.
თავდასხმა დაგმო ერაყის მთავრობამ, როგორც ესკალაცია და სუვერენიტეტის დარღვევა.
7 ოქტომბერს ჰამასის მიერ ისრაელზე თავდასხმის შემდეგ რეგიონში ამერიკულ ბაზებზე იერიშები გახშირდა. პროირანული დაჯგუფებების თქმით, აშშ-ს ბაზებზე იერიშები ამერიკის მხრიდან ომში ისრაელის მხარდაჭერის საპასუხოდ ხორციელდება.
-
აშშ-მ სირიაში ირანთან დაკავშირებულ ობიექტებზე მორიგი საჰაერო იერიში მიიტანა
-
აშშ: 17 ოქტომბრის შემდეგ ერაყსა და სირიაში ჩვენსა და კოალიციის ჯარებს 46-ჯერ დაესხნენ თავს
ჰამას-ისრაელის ომის დაწყების შემდეგ, აშშ-მ ახლო აღმოსავლეთში ორი ავიამზიდი და დამატებით 2 000 საზღვაო ქვეითი გაგზავნა, ხოლო 5 ნოემბერს რეგიონში ბირთვული წყალქვეშა ნავების განთავსება დააანონსა.
