საქართველოს რეგიონული განვითარებისა და ინფრასტრუქტურის სამინისტროს ინფორმაციით, 12 ოქტომბრიდან რიკოთზე მსუბუქი ავტოტრანსპორტისთვის გადაადგილების სპეციალური რეჟიმი უქმდება. სპეციალური რეჟიმი გაუქმებული იქნება სამგზავრო ავტოტრანსპორტის შემთხვევაშიც და მათ დღე-ღამის ნებისმიერ მონაკვეთში შეეძლებათ გადაადგილება.
სამინისტროს განცხადებით, მისაბმელიანი და ნახევრად მისაბმელიანი ავტოტრანსპორტისთვის გადაადგილების სპეციალური რეჟიმი რჩება ძალაში, თუმცა იზრდება 4 საათით. შესაბამისად, მისაბმელიანი და ნახევრად მისაბმელიანი ავტოტრანსპორტის გადაადგილება რიკოთზე დაშვებული იქნება ორმხრივად – 21:00 საათიდან 07:00 საათამდე.
"იმის გათვისწინებით, რომ რიკოთის საუღელტეხილო გზაზე ავტოტრანსპორტის მოძრაობის ინტენსივობა საგრძნობლად შემცირდა, დასრულდა აღნიშნული გზის 149-ზე კმ-ზე ფერდის სტაბილიზაციის საპროექტო სამუშაოები და დაიწყო მოსამზადებელი სამშენებლო სამუშაოები, მიმდინარე წლის 12 ოქტომბრიდან რიკოთის უღელტეხილზე დაწესებული ავტოტრანსპორტის მოძრაობის სპეციალური რეჟიმი იცვლება". – წერია ინფრასტრუქტურის სამინისტროს ოფიციალურ გვერდზე გავრცელებულ განცხადებაში.
11 აპრილს რიკოთის უღელტეხილზე მოძრაობა აიკრძალა – მიზეზად გზების დეპარტამენტმა "მცირე ქვათაცვენის" გამო გზების გაწმენდის საჭიროება დაასახელა.
13 აპრილს, შინაგან საქმეთა სამინისტროს ინფორმაციით, რიკოთის უღელტეხილზე საგზაო მოძრაობა ყველა სახის ტრანსპორტისთვის სპეციალური რეჟიმით გაიხსნა.