"ლუზერ ადამიანზე, ზურა გირჩი-ჯაფარიძეზე კომენტარი რატომ უნდა გავაკეთო, მაგრამ აი, მორიგი მაგალითი, გამოიყენეს ეს ახალგაზრდა ანარქისტი, ასროლინეს მოლოტოვის კოქტეილი პოლიციელზე" - ასე უპასუხა პრემიერმინისტრმა ირაკლი ღარიბაშვილმა ლაზარე გრიგორიადისზე დასმულ კითხვას. ჟურნალისტებმა მას გირჩი-მეტი თავისუფლების ლიდერის სტატუსი წაუკითხეს, რომლის მიხედვითაც, სისტემამ ერთი ადამიანი გამოარჩია და დასაჯა.
პრემიერის ამ კომენტარზე მედიის წარმომადგენლებმა აღნიშნეს, რომ ლაზარე გრიგორიადისი პოლიციელზე ძალადობისთვის არ გაუსამართლებიათ - მას პატიმრობა მამის დაჭრის საქმეზე მიუსაჯეს.
"არ მაინტერესებს, რაზე გაასამართლეს, მამამისის დაჭრაზე. არ მაინტერესებს, არ მაინტერესებს, მე ფაქტზე გიყვებით, რომ მოლოტოვის კოქტეილი ისროლა ადამიანმა, მნიშვნელობა არ აქვს, ვინ არის ეს ადამიანი, სცადა პოლიციელის ცოცხლად დაწვა, ჩვენ ვიქნებით დაუნდობელი და უკომპრომისო ყველა ადამიანის მიმართ, ერთი კი არა, 1 000 რომ იყოს. ათასივე წავა ციხეში" - თქვა პრემიერმინისტრმა.
ლაზარე გრიგორიადისი მამის, ბექა გრიგორიადისის დაჭრის საქმეზე თბილისის საქალაქო სასამართლომ დამნაშავედ ცნო. მას 1 წლითა და 6 თვის ვადით თავისუფლების აღკვეთა მიესაჯა.
მოსამართლის გადაწყვეტილებით, ლაზარე გრიგორიადისს სისხლის სამართლის კოდექსის 11 პრიმა 120-ე მუხლით წარდგენილი ბრალდება, რაც ჯანმრთელობის განზრახ მსუბუქ დაზიანებას გულისხმობს, ოჯახის წევრის მიმართ ჩადენილი ძალადობით გადაუკვალიფიცირდა.
სასამართლომ ლაზარე გრიგორიადისი დამნაშავედ ცნო მამის, ბექა გრიგორიადისის მანქანის დაზიანებაშიც და ამისთვის სასჯელის სახით 3 000-ლარიანი ჯარიმა განუსაზღვრა. თუმცა, სასჯელის შთანთქმის პრინციპით გრიგორიადისს ჯარიმის გადახდა არ მოუწევს. როგორც ინტერპრესნიუსი წერს, სასამართლოზე ლაზარე გრიგორიადისის მამამ, ბექა გრიგორიადისმა დარბაზიდან განაცხადა, რომ "ძალიან მთვრალი იყო და ბავშვი არაფერ შუაში იყო". მოსამართლემ ის წესრიგის დარღვევის გამო სხდომათა დარბაზიდან გააძევა.
ლაზარე გრიგორიადისს მამის, ბექა გრიგორიადისის ჯანმრთელობის განზრახ მსუბუქ დაზიანებასა და სხვისი ნივთის დაზიანებას ედავებოდნენ. შემთხვევა 2021 წელს მოხდა. გამოძიების ვერსიით, ლაზარე გრიგორიადისმა მამას ცივი იარაღით, დანით ბარძაყის არეში დაზიანება მიაყენა და მისი კუთვნილი ავტომანქანის უკანა საქარე მინა ჩაამტვრია.
პოლიციამ 21 წლის ლაზარე გრიგორიადისი 29 მარტს დააკავა. პროკურატურის მტკიცებით, რუსული კანონის საწინააღმდეგო აქციებზე გრიგორიადისმა შს სამინისტროს განსაკუთრებულ დავალებათა დეპარტამენტის თანამშრომლების მიმართულებით ორჯერ ისროლა ე.წ. მოლოტოვის კოქტეილი. ამასთან, უწყება დაკავებულს ედავება, რომ მან 9 მარტს, ღამის საათებში განზრახ წაუკიდა ცეცხლი შინაგან საქმეთა სამინისტროს კუთვნილ ტოიოტა კოროლას მოდელის ავტომანქანას.
გრიგორიადისის ადვოკატებმა პრემიერმინისტრ ირაკლი ღარიბაშვილისა და ქართული ოცნების თავმჯდომარის, ირაკლი კობახიძის წინააღმდეგ თბილისის საქალაქო სასამართლოს სამოქალაქო საქმეთა კოლეგიას მიმართეს. სარჩელის მოტივი ლაზარე გრიგორიადისის შესახებ პატივისა და ღირსების შემლახველი განცხადებების საჯაროდ გავრცელებაა. ადვოკატები ითხოვენ, ღარიბაშვილსა და კობახიძეს დაეკისროს მორალური ზიანის ანაზღაურება, თითოეულს 15 ლარის ოდენობით. მოსარჩელე ასევე მოითხოვს პრემიერმინისტრმა და ქართული ოცნების თავმჯდომარემ მოიხადონ ბოდიში საჯაროდ.
"ჩანს, რომ ყველანაირი ორიენტაცია არეული აქვს", "გზას აცდენილი კაცი" – თქვა ქართული ოცნების თავმჯდომარემ ირაკლი კობახიძემ ლაზარე გრიგორიადისზე მისი დაკავების შემდეგ. პრემიერმინისტრმა ირაკლი ღარიბაშვილმა კი გრიგორიადისს "ანარქისტი" უწოდა.
