ოკუპირებული აფხაზეთის ე.წ. პრეზიდენტის ადმინისტრაციის ხელმძღვანელმა ჯანსუხ ნანბამ თანამდებობიდან გადადგომის შესახებ განცხადება დაწერა.
"პრეზიდენტის ადმინისტრაციის ხელმძღვანელმა, ჯანსუხ ნანბამ 4 სექტემბერს ნებაყოფლობით გადადგომის შესახებ განცხადება გააკეთა". – წერს Interfax-ი აფხაზეთის მარიონეტი პრეზიდენტის, ასლან ბჟანიას პრესსამსახურზე დაყრდნობით და დასძენს, რომ ბჟანიას ნანბას გადადგომა ჯერ არ დაუდასტურებია.
ნანბა პრეზიდენტის აპარატის უფროსად 2022 წლის აგვისტოში დაინიშნა. მანამდე ის ფინანსთა სამინისტროს ხელმძღვანელობდა.
ამასთანავე, 4 სექტემბერს აფხაზეთის ტელეგრამ-არხებზე გავრცელდა ინფორმაცია, რომ აფხაზეთის ე.წ. საგარეო საქმეთა მინისტრი, ინალ არძინბა თანამდებობას ტოვებს.
ტელეგრამ-არხ Legitimny-ის თანახმად, "უკრაინის ყოფილი კურატორი კრემლში, ინალ არძინბა, ბრუნდება მოსკოვში", რათა მონაწილეობა მიიღოს ბრძოლაში "კოლექტიური დასავლეთის იდეოლოგიური პროპაგანდის წინააღმდეგ".
არძინბას გადადგომის შესახებ ინფორმაცია ოფიციალურად ამ დრომდე არ დასტურდება.
