ქართული ოცნების დეპუტატი, ირაკლი ზარქუა 44 ევროპარლამენტარის მოწოდებას გამოეხმაურა, სადაც ისინი საქართველოს ექსპრეზიდენტის, მიხეილ სააკაშვილის სამკურნალოდ ევროკავშირის ერთ-ერთ წევრ ქვეყანაში გადაყვანას ითხოვენ. ზარქუამ ევროპარლამენტარებს დასვენება ურჩია.
"პატივცემულო ევროპარლამენტარებო, მოგმართავთ: ზაფხულია, დაისვენეთ. თქვენს სახელმწიფოებს მიხედეთ, სადაც ინფლაცია მაღალია, უამრავი გამოწვევაა. იმ პრობლემებსა და გამოწვევებზე კონცენტრირდით, რაც ევროპასა და ევროკავშირს აქვს. რაც პრობლემას ქმნის, ეს არის რუსეთის აგრესია. ამაზე კონცენტრირდით. ეს ლობისტური კამპანია ხომ უნდა დასრულდეს. ქალბატონმა გიულიმ ასეთი რა გადაიხადა? რომ ვერ ეშვებიან. ამიტომ, საფუძველი არ არის, რომ პატიმარი სააკაშვილი გადაიყვანონ რომელიმე სახელმწიფოში კი არა, კლინიკიდან კლინიკაშიც კი და ეს სტრასბურგის სასამართლომ დაადგინა". - თქვა ზარქუამ ჟურნალისტებთან საუბარში.
ევროპარლამენტის 44 წევრისგან შემდგარი ჯგუფი საქართველოს ხელისუფლებას მოუწოდებს, ყოფილი პრეზიდენტი, მიხეილ სააკაშვილი ევროკავშირის ერთ-ერთ წევრ ქვეყანაში გადაიყვანონ, სადაც მას შეეძლება, მიიღოს საჭირო და შესაბამისი სამედიცინო დახმარება. ამის შესახებ ევროპარლამენტარები მათ მიერ გავრცელებულ საერთო წერილში საუბრობენ.
44 ევროპარლამენტარი პრეზიდენტს, პარლამენტის თავმჯდომარეს, შალვა პაპუაშვილსა და პრემიერმინისტრ ირაკლი ღარიბაშვილს მიმართავს. ისინი აღნიშნავენ, რომ ევროკავშირის წევრი და წევრობის კანდიდატი ქვეყნებისგან მოელიან ევროპული ღირებულებებისადმი ერთგულებას, რომელიც ადამინის უნივერსალური უფლების აღიარებასაც გულისხმობს.
"ჩვენ, ევროპარლამენტის ქვემორე ხელმომწერი წევრები ვწერთ, რათა გამოვხატოთ ჩვენი ღრმა შეშფოთება ბოლო დროს სასამართლო სხდომიდან შემაშფოთებელი ვიზუალური მტკიცებულებების გავრცელებასთან დაკავშირებით, რომელიც ცალსახად ასახავს საქართველოს ყოფილი პრეზიდენტის მიხეილ სააკაშვილის ჯანმრთელობის სწრაფ და მძიმე გაუარესებას. აშკარაა, რომ სააკაშვილის ამჟამინდელი მდგომარეობაღრმად შემაშფოთებელია, ამასთან შეიცავს პოტენციალს გამოიწვიოს შეუქცევადი შედეგები და ადამიანის სიცოცხლის დაკარგვა.
ჩვენ მტკიცედ გვჯერა, რომ სააკაშვილის გაუარესებული ჯანმრთელობის მდგომარეობა და მისი მიმდინარეობა მიუთითებს იმაზე, რომ სამედიცინო ღონისძიებები არც უზრუნველყოფს და არც ხელს უწყობს მის სწრაფ აღდგენას. ამიტომ, განსაკუთრებით მნიშვნელოვანია, რომ მიღებულ იქნას გადაუდებელი ზომები ამ მდგომარეობის სასწრაფოდ გამოსასწორებლად, სანამ ის კრიტიკულ სტადიას მიაღწევს.
მიხეილ სააკაშვილის მდგომარეობის დაჩქარებული გაუარესების გათვალისწინებით ჩვენ, ევროპარლამენტის ქვემორე ხელმომწერი წევრები, სასწრაფოდ მოგიწოდებთ, მხარი დაუჭიროთ ერთადერთ ემპათიურ, მორალურად სამართლიან და ქმედით გადაწყვეტილებას: გადაიყვანოთ ყოფილი პრეზიდენტი სააკაშვილი ევროკავშირის ერთ-ერთ წევრ ქვეყანაში, სადაც მას შეეძლება მიიღოს საჭირო და სათანადო სამედიცინო დახმარება.
როგორც ევროპარლამენტის წევრები, ჩვენ ხაზს ვუსვამთ უნივერსალური ადამიანური ღირებულებების მნიშვნელობას, რომელიც აღიარებს თითოეული ადამიანის ღირსებას. Ჩვენ ველით, დათქმების გარეშე, ევროკავშირის წევრმა და კანდიდატმა ქვეყნებმა აჩვენონ თავიანთი ურყევი ერთგულება ამ საერთო ევროპული ღირებულებებისადმი.
საქართველოსა და ევროკავშირს შორის ნებისმიერი შემდგომი ინტეგრაცია ეფუძნება ფუნდამენტური ჰუმანიტარული პრინციპების, მათ შორის ადამიანური თანაგრძნობისა და ნებისმიერი ინდივიდისთვის ადეკვატური სამედიცინო დახმარების მიღების ბაზისურ უფლებებისადმი თანაბრად ურყევი ერთგულების დემონსტრირებას.
გვჯერა, რომ ამ საკითხს დიდ ყურადღებას დაუთმობთ და საჭირო ნაბიჯებს გადადგამთ, რათა ბატონი სააკაშვილის ჯანმრთელობისა და კეთილდღეობის დაცვა უზრუნველყოთ".-აღნიშნულია განცხადებაში.
