ნივთიერება, რომლის აღმოჩენის გამო გასულ კვირას ღამით თეთრ სახლში ევაკუაცია გამოცხადდა, კოკაინი აღმოჩნდა. ამის შესახებ ინფორმაციას BBC-ი ავრცელებს.
სამართალდამცავი ორგანოს მაღალჩინოსანმა CBS News-ს უთხრა, რომ ნივთიერება აღმოაჩინეს კარადაში, რომელსაც თეთრი სახლის თანამშრომლები და სტუმრები მობილური ტელეფონების შესანახად იყენებენ.
ამასთანავე, ნარკოტიკის თეთრ სახლში აღმოჩენისას აშშ-ს პრეზიდენტი, ჯო ბაიდენი და მისი ოჯახი კემპ დევიდის რეზიდენციაში იმყოფებოდნენ.
BBC-ი წერს, რომ საიდუმლო სამსახური ცდილობს იმის გარკვევას, თუ როგორ მოხვდა ნივთიერება თეთრ სახლში. ამისთვის ისინი კამერებსა და იმ ადამიანებს ამოწმებენ, ვისაც ტერიტორიაზე წვდომა ჰქონდა.
მედიის ინფორმაციით, შენობის იმ ნაწილთან, სადაც კოკაინი აღმოაჩინეს, პრეზიდენტს, თეთრი სახლის შტაბის უფროსს, პრესმდივანსა და ასობით სხვა თანამშრომელს აქვს წვდომა.