ლატვიის პარლამენტმა პრეზიდენტის თანამდებობაზე სამი სავარაუდო კანდიდატიდან ედგარს რინკევიჩი აირჩია.
კენჭისყრაში 100-კაციანი ჯგუფი იღებდა მონაწილეობას. რინკევიჩმა ხმათა უმრავლესობა მოიპოვა. გამარჯვებისთვის მას, სულ მცირე, 51 ხმა სჭირდებოდა. რინკევიჩმა 52 ხმა მიიღო.
ედგარს რინკევიჩს 2011 წლიდან ლატვიის მთავრობაში მაღალი თანამდებობები უკავია. ამ დრომდე ის საგარეო საქმეთა მინისტრის პოზიციაზე მსახურობდა. მანამდე იყო ლატვიის სახელმწიფო მდივანი.
რინკევიჩი, როგორც საგარეო საქმეთა მინისტრი, მოსახლეობაში დიდი პოპულარობით სარგებლობს. ის ცნობილია უკრაინის აქტიური მხარდაჭერითა და რუსეთთან მიმართებაში მკაცრი პოზიციით.
ედგარს რინკევიჩი ბალტიისპირეთის ქვეყნებიდან პირველი ჰომოსექსუალი პრეზიდენტი იქნება. საკუთარ ორიენტაციასთან დაკავშირებით მან ჯერ კიდევ 2014 წელს ისაუბრა საჯაროდ.
