ოკუპირებულ აფხაზეთში რუსეთის მოქალაქეების გატაცებაში ეჭვმიტანილი პირები დააკავეს. ამის შესახებ ინფორმაცია მარიონეტული რეჟიმის ე.წ. პროკურატურამ გაავრცელა.
განცხადების მიხედვით, 14 აპრილს რუსეთის მოქალაქეები ლეონიდ შოკლერი გაიტაცეს. შემთხვევა სავაჭრო ცენტრი სოხუმ-მარკეტის მიმდებარე ტერიტორიაზე მოხდა. გამტაცებლები შოკლერის გათავისუფლების სანაცვლოდ დედამისისგან $5 000-ს ითხოვდნენ. მას შემდეგ, რაც მათ თანხა მიიღეს, რუსეთის მოქალაქე გაათავისუფლეს.
19 აპრილს გამტაცებლების სამიზნე გახდა შოკლერის მეგობარი, ასევე რუსეთის მოქალაქე შეიხ ისმაილი. მან გამტაცებლებისგან გაქცევა შეძლო.
22 აპრილს დააკავეს 5 პირი, რომლებიც ეჭვმიტანილები იყვნენ რუსეთის მოქალაქეების გატაცებაში. 24 აპრილს დააკავეს მეექვსე პირიც.