უკრაინის ელჩმა დიდ ბრიტანეთში, ვადიმ პრისტაიკომ პოლონეთის პრეზიდენტს ანდჟეი დუდას უპასუხა, რომელმაც აღნიშნა, რომ უკრაინაში თვითმფრინავების გაგზავნა პოლონეთისთვის სერიოზულ პრობლემებს წარმოქმნის: "დაველოდოთ და ვნახოთ".
დუდას თქმით, უკრაინის მოკავშირეების ნებისმიერი ნაბიჯი უკრაინაში გამანადგურებლების გაგზავნის შესახებ უნდა იყოს ერთობლივი გადაწყვეტილება.
"[უკრაინაში] მცირე რაოდენობით გამანადგურებლების გაგზავნაც კი [პოლონეთისთვის] სერიოზულ პრობლემებს წარმოქმნის, რადგან პირდაპირ შემიძლია ვთქვა, რომ საკმარისი რაოდენობის თვითმფრინავები არ გვაქვს". - ამბობს დუდა.
დუდას თქმით, ამჟამად პოლონეთს 50-ზე ნაკლები საბრძოლო თვითმფრინავი აქვს.
BBC-ის შეკითხვაზე, იყო თუ არა იმედგაცრუებული დუდას კომენტარით, პრისტაიკომ თქვა: "არა, დაველოდოთ და ვნახოთ".
"ეს ისაა, რაც ტანკებზე გვესმოდა. ეს ისაა, რაც გვითხრეს არტილერიაზე, ეს ისაა, რაც გვესმოდა ნებისმიერი ტიპის სამხედრო დახმარებაზე". - ამბობს პრისტაიკო.
31 იანვარს, ამერიკის შეერთებული შტატების პრეზიდენტმა, ჯო ბაიდენმა თქვა, რომ აშშ უკრაინისთვის F-16 მოიერიშე თვითმფრინავების მიწოდებას არ გეგმავს.
"არა" - უპასუხა ბაიდენმა ჟურნალისტს თეთრ სახლში კითხვაზე, აპირებდა თუ არა აშშ F-16-ების მიწოდებას.
უკრაინამ F-16 მოერიშე თვითმფრინავის გადაცემის თაობაზე თხოვნით ასევე ნიდერლანდებს მიმართა, ხოლო ნიდერლანდების თავდაცვის მინისტრმა აღნიშნა, რომ ეს უკრაინის მხრიდან გასაგები თხოვნაა, თუმცა ის რთულ პროცესთან არის დაკავშირებული.
"ჩვენ უნდა განვიხილოთ F-16-ების ხელმისაწვდომობა აშშ-სთან და სხვა მოკავშირეებთან და სერიოზულად უნდა შევხედოთ მოსალოდნელ შედეგებს. არ შეიძლება, ეს ერთ ღამეში მოხდეს. ამ საკითხზე გულწრფელები უნდა ვიყოთ". – აღნიშნა ნიდერლანდების თავდაცვის მინისტრმა.
