გერმანიის თავდაცვის მინისტრმა, ბორის პისტორიუსმა უკრაინისთვის გაზაფხულისთვის მილიარდი ევროს ოდენობის სამხედრო დახმარების პაკეტის გამოყოფის შესახებ განაცხადა.
როგორც უკრაინული მედია გერმანიის საზოგადოებრივ მაუწყებელ ZDF-ზე დაყრდნობით წერს, ამის შესახებ ბორის პისტორიუსმა გერმანიაში, რამშტაინის სამხედრო ბაზაზე უკრაინის საკონტაქტო ჯგუფის შეხვედრის მსვლელობისას ილაპარაკა.
პისტორიუსის თქმით, სამხედრო დახმარების პაკეტში Marder-ის 40 ქვეითთა საბრძოლო მანქანა, Gepard-ის ტიპის 7 თვითმავალი საზენიტო დანადგარი, Patriot-ის ერთ საზენიტო-სარაკეტო სისტემა, IRIS-T-ის კიდევ ერთი საზენიტო-სარაკეტო კომპლექსი და მისთვის საჭირო რაკეტები შევა.
მან აღნიშნა, რომ ქვეითთა საბრძოლო მანქანებსა და Patriot-სთვის უკრაინელი სამხედროების წვრთნა იანვრის ბოლოს დაიწყება.
ბოლოს გამოცხადებული პაკეტის გათვალისწინებით, გერმანიის მიერ უკრაინისთვის გაწეული სამხედრო დახმარება 3.3 მილიარდ ევროს გადააჭარბებს.
"გერმანია არ გაჩერდება და არ იტყვის უარს უკრაინის მხარდაჭერაზე." – თქვა პისტორიუსმა.
ბორის პისტორიუსმა თქვა, რომ მოკავშირეებს უკრაინისთვის Leopard 2-ის ტანკების მიწოდების საკითხზე შეთანხმებისთვის ჯერ არ მიუღწევიათ.
აშშ და ევროპის ქვეყნები უკვე დაჰპირდა კიევს, რომ რუსეთის წინააღმდეგ საბრძოლველად მეტ აღჭურვილობას მიაწვდიდა. პარალელურად კი იზრდება ზეწოლა ბერლინზე, რათა უკრაინას Leopard 2-ის ტანკები გაუგზავნოს.
"ეს Leopard-ები რუსეთში არ გაივლიან. ჩვენ მხოლოდ საკუთარ თავს ვიცავთ". - თქვა ზელენსკიმ და გერმანიის მთავრობის მერყევი დამოუკიდებლობა გააკრიტიკა.
პოლონეთსა და ფინეთს Leopard-ის ტანკების უკრაინისთვის გასაგზავნად გერმანიის, როგორც მწარმოებელი ქვეყნის, ნებართვა სჭირდება. თუმცა, პოლონეთის საგარეო საქმეთა მინისტრის თქმით, ვარშავამ უკრაინას ტანკები ნებართვის გარეშეც შეიძლება მიაწოდოს