უკრაინის პრეზიდენტმა, ვოლოდიმირ ზელენსკიმ ხელი მოაწერა სანქციების სიას, რომელშიც ქართველი ოლიგარქის, ბიძინა ივანიშვილის ნათესავები და ახლობლებიც შედიან. განკარგულება პრეზიდენტის გვერდზეა გამოქვეყნებული.
უკრაინის მიერ სანქცირებული 256 პირიდან 4 საქართველოს მოქალაქეა, რომელთაც კავშირი აქვთ ბიძინა ივანიშვილთან.
სანქცირებულთა შორის არიან: ბიძინა ივანიშვილის ძმა, ალექსანდრე ივანიშვილი, ბიძინა ივანიშვილის დეიდაშვილი, უჩა მამაცაშვილი, უჩა მამაცაშვილის შვილი, ტატე მამაცაშვილი და ქეთევან ხარაიძე.
საქართველოს 4 მოქალაქეზე დაწესებული სანქციები მოიცავს 13 შეზღუდვას:
1) აქტივების დაბლოკვას;
2) სავაჭრო ტრანზაქციების შეზღუდვას;
3) უკრაინის ტერიტორიაზე რესურსების ტრანზიტის, ფრენებისა და ტრანსპორტირების ნაწილობრივ ან სრულ შეწყვეტას;
4) უკრაინის საზღვრებს გარეთ კაპიტალის გატანის შეზღუდვას;
5) ეკონომიკური და ფინანსური ვალდებულებების შეჩერებას;
6) კონკრეტულ აქტივობებზე, კერძოდ, წიაღისეულის გამოყენების, ლიცენზიებისა და სხვა სახის ნებართვების შეჩერებას;
7) პრივატიზაციაში მონაწილეობის, უცხო ქვეყნის მოქალაქის მიერ სახელმწიფო საკუთრების იჯარით აღების აკრძალვას;
8) უკრაინის ტერიტორიაზე უცხოეთის არასამხედრო და სამხედრო ხომალდების უკრაინის ზღვაში, პორტებში, საჰაერო სივრცეში შეყვანის აკრძალვას;
9) უცხო ქვეყანაში ინვესტიციებისთვის უკრაინის ეროვნული ბანკის ნებართვებისა და ლიცენზიების გაცემის აკრძალვას;
10) უკრაინაში უცხო ქვეყნიდან იმპორტირების ლიცენზიის ან უკრაინიდან სავალუტო ღირებულებების გატანის აკრძალვას და უცხო ქვეყნის რეზიდენტების მიერ გაცემულ საგადასახადო ბარათებზე ნაღდი ფულის გაცემის შეზღუდვას;
11) ტექნოლოგიებისა და ინტელექუტალური საკუთრების ობიექტების გადაცემის აკრძალვას;
12) უკრაინის სახელმწიფო ჯილდოებისა და სხვა აღიარებების ჩამორთმევას;
13) მიწის ნაკვეთებზე საკუთრების უფლების შეძენის აკრძალვას.