უკრაინის თავდაცვის მინისტრის, ოლეკს რეზნიკოვის განცხადებით, გერმანული საჰაერო თავდაცვის სისტემები უკვე უკრაინაშია.
"უკრაინაში საჰაერო თავდაცვის ახალი ერა დაიწყო. IRIS-T-ები გერმანიიდან უკვე აქაა. ამერიკული NASAMS-ები კი მოდის. ეს მხოლოდ დასაწყისია. და ჩვენ გვჭირდება მეტი. ეჭვგარეშეა, რომ რუსეთი ტერორისტული სახელმწიფოა" - წერს რეზნიკოვი Twitter-ზე.
რამდენიმე თვის წინ, გერმანიის ფედერალური მთავრობა უკრაინას თანამედროვე საჰაერო თავდაცვის სისტემას დაპირდა. 11 ოქტომბერს Spiegel-მა გაავრცელა ინფორმაცია, რომ გერმანიამ უკრაინას დაპირებული ოთხი IRIS-T SLM საჰაერო თავდაცვის სისტემიდან ერთი უკვე მიაწოდა. აღსანიშნავია, რომ პირველი გადაცემა ნოემბერში იგეგმებოდა.
გერმანიის ფედერალური მთავრობის განცხადებით, IRIS-T SLM არის ყველაზე თანამედროვე საჰაერო თავდაცვის სისტემა გერმანიაში. იგი შეიმუშავა გერმანული შეიარაღების კომპანია Diehl Defense-მა.
გერმანიის კანცლერის, ოლაფ შოლცის თქმით, სახმელეთო საზენიტო სისტემა, უპირველეს ყოვლისა, რუსული არმიის საჰაერო თავდასხმების მოგერიებით მშვიდობიანი მოსახლეობის დაცვას ისახავს მიზნად. შოლცის განმარტებით, მიწოდებული ტექნიკით საჰაერო თავდასხმებისგან დიდი ქალაქების დაცვაც შესაძლებელია.