გუდაურში შსს-ს სასაზღვრო პოლიციის ვერტმფრენის ჩამოვარდნისა და ბორტზე მყოფი რვავე ადამიანის - ეკიპაჟის 4 წევრის, 2 მაშველისა და 2 მედიკოსის დაღუპვის გამო 30 ივლისი საქართველოში გლოვის დღეა.
ყველა ადმინისტრაციულ შენობაზე საქართველოს სახელმწიფო დროშა დაშვებულია.
შსს-ს ინფორმაციით, ყველა დაღუპულის ცხედარი ამოსვენებულია.
29 ივლისს გუდაურში შსს-ს სასაზღვრო პოლიციის ვერტმფრენმა მართვა დაკარგა და ჩამოვარდა. შედეგად, დაიღუპა ბორტზე მყოფი 8-ვე ადამიანი. სამაშველო ვერტმფრენით მედიკოსები და მაშველები მიდიოდნენ მოქალაქეების დასახმარებლად, რომლებიც პარაპლანით კლდეს შეეჯახნენ და დაშავდნენ. მოგვიანებით, ერთ-ერთი მათგანი, უცხოელი ტურისტი გარდაიცვალა.
შსს-ს ინფორმაციით, საჰაერო ტრანსპორტის ექსპლუატაციის წესების დარღვევის ფაქტზე გამოძიება საქართველოს სისხლის სამართლის კოდექსის 275-ე მუხლით მიმდინარეობს.