რუსეთის უშიშროების საბჭოს თავმჯდომარის მოადგილე და ყოფილი პრეზიდენტი, დმიტრი მედვედევი Telegram-ზე წერს, რომ ამჟამად აშშ-სა და რუსეთს კავშირი არ აქვთ. მედვედევის სიტყვებით, ქვეყნებს შორის ურთიერთობა "ნულოვან კელვინზეა".
ბირთვული ხელშეკრულების შემდგომი მოლაპარაკებების პერსპექტივაზე საუბრისას, მედვედევმა აღნიშნა, რომ ახლა აშშ-სა და რუსეთს შორის მოლაპარაკებებისთვის ყველაზე არახელსაყრელი დროა.
"ჩვენ ახლა არანაირი ურთიერთობა არ გვაქვს აშშ-სთან. ისინი ნულოვან კელვინზე არიან და დღეს მათი გაყინვის საჭიროება არ დგას. მათთან მოლაპარაკება ჯერ არ არის საჭირო. დაე, თვითონ მოვიდნენ, ან მოღოღდნენ და გვთხოვონ [შეთანხმება]. და შეაფასონ ეს, როგორც განსაკუთრებული მოწყალება. წინააღმდეგ შემთხვევაში ეს ასე ჩანს: ისინი საზიზღრობებს გვიკეთებენ და ჩვენ თურმე ბირთვული შეთანხმება უნდა მივართვათ". - წერს მედვედევი.
START III, ანუ სტრატეგიული შეიარაღების შემცირების, იგივე ორმხრივი შეიარაღების კონტროლის ხელშეკრულება შეერთებულ შტატებსა და რუსეთს შორის, ორივე ქვეყნის ბირთვული იარაღის არსენალის მკვეთრად შემცირებას ისახავს მიზნად.
