ტურიზმი

ახალი ავიაკომპანია საქართველოში – Condor Airlines თბილისი-ფრანკფურტის რეისებს შეასრულებს

1-ლი მაისიდან საქართველოს ავიაბაზარზე ახალი ავიაკომპანია Condor Airlines-ი შემოდის. გერმანული ავიაკომპანია პირდაპირ რეგულარულ ფრენებს ფრანკფურტი-თბილისი-ფრანკფურტის საჰაერო ხაზზე კვირაში ორჯერ შეასრულებს. ბილეთების შეძენა ავიაკომპანიის ვებგვერდზე უკვე შესაძლებელია.

საქართველოს აეროპორტების გაერთიანების დირექტორის თამარ არჩუაძის თქმით, Condor-ის შემოსვლა ავიაბაზარზე განსაკუთრებით  ტრანსატლანტიკური ტრანზიტული ფრენების მიმართულებით არის მნიშვნელოვანი.

"ფრანკფურტი იქნება რიგით მესამე ქალაქი, სადაც ამ ეტაპზე, თბილისის აეროპორტიდან მოხვედრა გახდება შესაძლებელი. ჩვენთვის გერმანია არის სტრატეგიულად მნიშვნელოვანი  მიმართულება. ამიტომაც ყოველთვის პროაქტიულად ვმუშაობთ, რაც შეიძლება მეტი ავიაკომპანია დავაინტერესოთ და მეტი მიმართულება დავამატოთ გერმანიის ფედერაციული რესპუბლიკის მიმართულებით. ჩვენ მუდმივად ვცდილობთ მიმართულებების დივერსიფიცირებას ჩვენს საერთაშორისო აეროპორტებში. ჩვენი კიდევ ერთი პარტნიორი ავიაკომპანია EUROWINGS ზაფხულში, თბილისიდან გერმანიის ქალაქ შტუტგარტის მიმართულებით იწყებს ფრენებს. ქუთაისის საერთაშორისო აეროპორტიდან კი ამ ეტაპზე, გერმანიის სამ ქალაქშია მოხვედრა შესაძლებელი: დედაქალაქ ბერლინში, მემინგენსა და დორტმუნდში. ეს ნიშნავს მეტ საერთაშორისო ვიზიტორსა და მეტ მაღალმხარჯველ ტურისტს ჩვენი ქვეყნის ეკონომიკისთვის, ასევე, საქართველოს ცნობადობის ზრდას ჩვენს მიზნობრივ ბაზრებზე,-‘’აცხადებს თამარ არჩუაძე. 

ავიაკომპანია Condor-ი 1955 წელს დაფუძნდა. მას ძირითადი ბაზა ფრანკფურტის აეროპორტში აქვს. 2021 წლის ივლისის მონაცემებით, ავიაკომპანია 50 ბოინგისა და ეარბასის ტიპის საჰაერო ხომალდებს ფლობს. Condor-ი ფრენებს ხმელთაშუა ზღვის ქვეყნებში, აზიაში, აფრიკაში, ჩრდილოეთ და სამხრეთ ამერიკაში ასრულებს. 

კომენტარები