რა უნდა ამ სატანას პატრიარქთან? მახსოვს, 2013 წელს ყაზბეგში მქონდა საარჩევნო შეხვედრები, რა თქმა უნდა, მახლდნენ ტელევიზიებიც. როდესაც ადგილობრივმა აქტივმა მითხრა, პატრიარქი აქაა, სნოში, იქნებ მოგენახულებინაო, მე სიხარულით გავეშურე მასთან, თუმცა გზაში შემოგვითვალეს, რომ პატრიარქთან ჩემი არა თუ ტელეკადრი, არამედ ფოტოს გადაღებაც არ დაიშვებოდა. ადგილზე მისვლისას უწმინდესის დაცვას, უკლებლივ ყველას, ეცვა ქართული ოცნების მაისურები. ხოლო პატრიარქმა მათ მოსასმენად წამიკითხა ლექცია, რომ მარტო კრიტიკა კი არაა მთავარი, საქმეც უნდა აკეთო თურმე. მოკლედ ვულოცავ, რა თქმა უნდა, დაბადების დღეს, მაგრამ მრჩება შთაბეჭდილება, რომ ჩვენ გვყავს სამთავრობო პატრიარქი, რომელსაც ბნელ მასას ღმერთად უცხადებენ, რაც ქრისტიანობასთან უკვე ძალიან შორსაა. სადმე გინახავთ,რომ პოლიტ-ლიდერები თუ სახელმწიფოს ხელმძღვანელები იჩოქებდნენ სასულიერო პირი წინაშე ყველას დასანახად? არავითარი სახელმწიფო ჩვენგან კაი ხანი არ შედგება. ჩვენ ვქმნით მუდმივად კერპებს, ვამსხვრევთ და მერე ისევ ვქმნით. აქაა სწორედ ჩვენი განუკურნებელი პრობლემა.
შალვა ნათელაშვილი
ნათელაშვილი: მრჩება შთაბეჭდილება, რომ ჩვენ გვყავს სამთავრობო პატრიარქი
