გერმანიის თავდაცვის მინისტრის, ქრისტინ ლამბრეხტის თქმით, NATO რუსეთის შეთავაზებებს განიხილავს, თუმცა მან ხაზი გაუსვა, რომ მოსკოვი ჩრდილოატლანტიკურ ალიანსს პოზიციებს ვერ უკარნახებს.
უკრაინა-რუსეთის დაძაბულობის ფონზე, 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.
"ერთმანეთთან საუბარია საჭირო, რაც ნიშნავს რუსეთის შეთავაზებების განხილვას, მაგრამ რუსეთი NATO-ს პარტნიორებს პოზიციებზე ვერ უკარნახებს", – თქვა გერმანიის თავდაცვის მინისტრმა ლიტვაში, რუკლაში ვიზიტის დროს.
"ჩვენ ამჟამინდელი დაძაბულობა დიპლომატიურ დონეზე უნდა გდავჭრათ, მაგრამ სანდო შემაკავებელი ქმედებაც გვჭირდება", – თქვა ლამბრეხტმა.