რამდენად უსაფრთხოა ის მოწყობილობები, აპლიკაციები თუ პლატფორმები, რომლებსაც ინფორმაციის გასაზიარებლად ვიყენებთ? ფეისბუქის, მესენჯერის, ვაიბერისა თუ სხვა ტიპის საკომუნიკაციო სივრცეებიდან ინფორმაციის გაჟონვის ფაქტები წლიდან წლამდე უფრო ხშირი ხდება, თუმცა, ვებსაიტების გარდა, არცთუ იშვიათად გვესმის სატელეფონო ზარების მოსმენებისა და მიმოწერის თვალთვალის შესახებ.
ზოგიერთ შემთხვევებში, ჩვენი პირადი ცხოვრება არა ინდივიდზე მიმართული, არამედ მასობრივი ჰაკერული თავდასხმის შედეგად საჯაროვდება, თუმცა არც ის შემთხვევებია იშვიათი, როცა სახელმწიფო ინსტიტუტები თვალთვალითა და მოსმენით მიღებულ მოქალაქეთა პირად ინფორმაციას სხვადასხვა პოლიტიკური ინტერესებიდან გამომდინარე იყენებენ.
გუშინ, პირველ აგვისტოს, მთავარი არხის დირექტორის, ნიკა გვარამიას მიერ, პირდაპირ ეთერში გავრცელდა, მისი თქმით, სახელმწიფო უსაფრთხოების სამსახურიდან მოპოვებული ოპერატიული დოკუმენტები, სადაც დეტალურადაა აღწერილი ფარული მიყურადებისა და თვალთვალის შედეგის ანგარიშები. ნიკა გვარამიას ცნობით, სუს-ი ამ ანგარიშებს ბიძინა ივანიშვილს უმზადებდა.
გვარამიამ მხოლოდ 2020 წლის წინასაარჩევნოდ გაკეთებული სავარაუდო ანგარიშები გაასაჯაროვა, რომელიც რამდენიმე ნაწილად იყოფა. ერთ-ერთი კრებსი მოიცავს სექსუალური ურთიერთობების სერიას, სადაც დეტალურადაა აღწერილი თანამდებობის პირების, ბიზნესმენების, როგორც მართლმადიდებლები ისე სხვა კონფესიის წარმომადგენლების, ჟურნალისტებისა და ოპოზიციის წევრების პირადი ცხოვრების ამსახველი დეტალები. ყოველი ასეთი შემთხვევის შემდეგ სუს-ის გასცემს მითითებას, რომ უზრუნველყოფილი იყოს ამ ადამიანების მიყურადება შემდეგ ჯერზეც.
ნიშანდობლივია, რომ ჩანაწერების ავთენტურობა რამდენიმე ადამიანმა დაადასტურა. მათ შორის არის არასამთავრობო ორგანიზაციების სამი წარმომადგენელი და რადიო თავისუფლებისა და ფორმულას ჟურნალისტები.
სანამ საზოგადოება გავრცელებული ჩანაწერების ავთენტურობაზე მსჯელობს, გთავაზობთ განსხვავებული ტიპისა და ფუნქციის, ყველაზე დაცულ საკომუნიკაციო საშუალებებს/პლატფორმებს, რომელთა გამოყენებაც თქვენი პერსონალური ინფორმაციის გაჟონვის ან მითვისების რისკს მნიშვნელოვნად შეამცირებს.
ყველაზე დაცული აპლიკაციები ტექსტური/ვოკალური კომუნიკაციისთვის
Wickr
Wickr-ი, უსაფრთხო მიმოწერის სივრცის გარდა, მომხმარებელს პრივატულ მასობრივ ჩატებს, ვიდეო ზარებსა და კონტენტის გაზიარების ფუნქციას სთავაზობს. აპლიკაცია მომხმარებელს უტოვებს უფლებას, გადაცემული ინფორმაცია, ვიდეო თუ მთლიანი ჩატი კონკრეტული დროის პერიოდის გასვლისთანავე წაშალოს, სურვილის შემთხვევაში – ავტომატურად. კომპანია სერვისებს ინდივიდუალური მომხმარებლის გარდა მცირე ბიზნესებსა და კორპორაციებსაც სთავაზობს(Wickr Pro და Wickr Enterprise).
Signal
Signal-ი თითქმის მთლიანად ტექსტობრივ კომუნიკაციაზეა ორიენტირებული და ფართოდაა აღიარებული, როგორც ყველაზე უსაფრთხო აპლიკაცია მოცემულ ჟანრში. Wickr-ის მსგავსად, აქაც ე.წ. End-to-End კოდირების სისტემა გამოიყენება, რაც მომხმარებელს გაცემულ ინფორმაციაზე სრულ კონტროლს აძლევს, თუმცა, განსხვავება ისაა, რომ აპლიკაციის დაცვითი მექანიზმები დეველოპერებისა და პროგრამისტების მიერ რეგულარულად იხედება და ნებისმიერი ხარვეზის დაფიქსირების შემთხვევაში, ახლდება.
ყველაზე დაცული E-Mail აპლიკაციები
ProtonMail
ვებსაიტის სიმარტივისა და იოლად გამოყენებადობის მიუხედავად, ProtonMail-ი ერთ-ერთი ყველაზე დაცული მეილია, რომელიც მომხმარებლის ინფორმაციას თანამედროვე, კომპლექსური ინსტრუმენტების გამოყენებით იცავს. მაგალითად, კომპანია მომხმარებელთა მეილებს ბრაუზერის საშუალების აგზავნის, რაც მათ სერვერებზე მინიმალურ, სრულად კოდირებულ ინფორმაციას ტოვებს.
MailFence
ProtonMail-ის მსგავსად, მეილების გადასაგზავნად და კოდირებისთვის ეს პლატფორმაც ბრაუზერის სისტემას იყენებს. როგორც კომპანიაში აცხადებენ: "თქვენი მეილების წაკითხვა ყველასთვის შეუძლებელია, მათ შორის, ჩვენთვისაც".
ყველაზე დაცული ვიდეო-კომუნიკაციის საშუალებები
მიუხედავად იმისა, რომ აპლიკაცია შედარებით სახელგატეხილ Facebook-ის ჯგუფს ეკუთვნის, WhatsApp-ი ერთ-ერთი ყველაზე დაცული აპლიკაციაა, რომელიც როგორც ტექსტური, ისე ვიდეო-კომუნიკაციის საშუალებას გაძლევთ. აპლიკაციის დამცავი სისტემა Open Whisper Systems-ის პროტოკოლის მიხედვითაა გაწერილი, რომელსაც, თავის მხრივ, ედუარდ სნოუდენის მხარდაჭერა აქვს!
SecureVideo
აპლიკაციის განმარტებაში ვკითხულობთ, რომ იგი HIPAA სტანდარტის შესაბამისი ვიდეოკონფერენციის სერვისებს გვთავაზობს, რომელიც დღესდღეობით ყველაზე დაცული, კომპლექსური და მკაცრი წესებისგან შემდგარი პროტოკოლია, რომელთა დარღვევაც ბიზნესებისთვის საკმაოდ მძიმე ფინანსურ სანქციებს გულისხმობს.
რაც შეეხება სატელეფონო ზარებსა და მესიჯებს, ამ შემთხვევაში მომხმარებელი მოწყობილობის მწარმოებლის მიერ შემუშავებული დაცვითი მექანიზმების იმედზე უნდა იყოს – რაც უფრო თანამედროვე, ძლიერი მექანიზმებითაა აღჭურვილი ტელეფონი და მასთან დაკავშირებული სერვერები, მით უფრო რთული იქნება მომხმარებლის ზარებისა თუ მიმოწერის თვალთვალი.
ერთ-ერთი ვერსიის მიხედვით, ამ მომენტისთვის ტოპ 5 ყველაზე დაცული სმარტფონი ასე გამოიყურება:
- Purism Librem 5
- Apple iPhone 12 Pro Max
- Blackphone 2
- Bittium Tough Mobile 2C
- Sirin V3
