ჩინეთის საგარეო საქმეთა მინისტრის, ვან ის თქმით, ჩინეთი და რუსეთი ფერად რევოლუციებსა და დეზინფორმაციას ერთად უნდა ებრძოდნენ, რათა სუვერენიტეტი და პოლიტიკური უსაფრთხოება გაიმყარონ.
"ჩვენ [ჩინეთმა და რუსეთმა] საერთო სტრატეგიული ნდობა უნდა გამოვიმუშაოთ და ჩვენი მთავარი ინტერესები უნდა დავიცვათ. ერთმანეთს ხელი უნდა ჩავჭიდოთ ფერადი რევოლუციებისთვის წინააღმდეგობის გასაწევად და დეზინფორმაციასთან საბრძოლველად". – თქვა საგარეო საქმეთა მინისტრმა.
შეგახსენებთ, რომ ფერადი რევოლუციის სახელით მოიხსენიებენ 2000-იანი წლებიდან დაწყებულ რევოლუციათა ტალღებს პოსტ-საბჭოთა ქვეყნებსა და ახლო აღმოსავლეთში. ფერად რევოლუციებს ეკუთვნის საქართველოში მომხდარი 2003 წლის ვარდების რევოლუციაც. ავტორიტარულ რეჟიმებში ფერად რევოლუციებს მუდამ აშშ-სა და დასავლეთის მიერ დაფინანსებულ გადატრიალებებად ახასიათებდნენ.
ვან ის თქმით, რუსეთი და ჩინეთი შეთანხმდნენ კეთილმეზობლობისა და მეგობრული კოოპერაციის შეთანხმების განახლებაზე. მისი შეფასებით ეს არსებული ვითარებიდან გამომდინარე ხდება.
"რუსეთი და ჩინეთი COVID-19-ის მსგავსი საუკუნის მოვლენის, პანდემიისა და პოლიტიკური ვირუსის წინააღმდეგ მხარდამხარ უნდა იდგნენ. მსოფლიო მშვიდობისა და სტაბილურობის ბურჯად ერთად მყოფი რუსეთისა და ჩინეთის გარდა ვერავინ დარჩება". – თქვა ვან იმ.
"რაც უფრო მეტად არასტაბილურია სამყარო, რუსეთისა და ჩინეთის კოოპერაცია უფრო მეტად არის საჭირო". – დაამატა ჩინეთის საგარეო საქმეთა მინისტრმა.