ნიკა მელიას საქმე

ბურჯანაძე: სამართლიანობაა, იდგე სიმართლის მხარეს და არა ვინმეს მხარეს, ან ვინმეს წინააღმდეგ

აქ არაფერ შუაში არ არის არც სააკაშვილი და არც არავინ. აქ არის სამართლიანობა-უსამართლობაზე საქმე და მე როცა სააკაშვილთან პრეტენზიები მქონდა და მაქვს, ჩემი პრეტენზიები მის მიმართ არის სამართლიანი. თუ უსამართლო პრეტენზიას წაუყენებს ვინმე, გინდა სააკაშვილს, გინდა ივანიშვილს, მე ყოველთვის სიმართლის გვერდზე ვიქნები. სიმართლე, სამართლიანობა და წესიერება საერთოდ ნიშნავს, რომ ვისზეც გაბრაზებული ხარ, თუნდაც უსამართლოდ, მისი დასჯა რომ არ გაგიხარდება, ესაა სამართლიანობა. აბა ახლა შენი მეგობრის და ოჯახის წევრის და ვინც გიყვარს იმ ადამიანის დასჯა არასდროს არ მოგინდება, დამნაშავეც რომ იყოს, მაშინაც კი. ეს არის დემოკრატია, ეს არის სამართალი, როცა შენ დგახარ სამართლის მხარეს და სიმართლის მხარეს, არა ვინმე კონკრეტული ადამიანის მხარეს ან ვინმეს ჯიბრზე, ვინმეს წინააღმდეგ.

ამის შესახებ ნინო ბურჯანაძე ენმ-ს ოფისში ჟურნალისტებს ესაუბრა. ბურჯანაძე სხვა ოპოზიციურ პოლიტიკოსებთან ერთად ენმ-ს ოფისში ნიკა მელიას მხარდასაჭერად მივიდა, სადაც ერთად ელოდებიან სასამართლოს გადაწყვეტილებას. ნიკა მელიასთვის იმუნიტეტის მოხსნის შემდეგ საქართველოს პროკურატურამ  სასამართლოს მიმართა, ენმ-ის თავმჯდომარეს აღკვეთის ღონისძიება, გირაო, პატიმრობით შეეცვალა. ნაციონალური მოძრაობის ლიდერის პროცესი თბილისის საქალაქო სასმართლოში დღეს, 16:00 საათზე დაიწყო.

 

კომენტარები