"ნიკა მელიას გამარჯვებას ვულოცავ! ჩვენი პარტიის წევრებსა და მხარდამჭერებს არჩევნებში მონაწილეობისათვის მადლობა მინდა გადავუხადო! ახლა მომავალი გამარჯვებების დროა, ამიტომ ყველამ ერთად უნდა შევძლოთ ჩვენი ქვეყნის გადარჩენა და განვითარება". – ერთიანი ნაციონალური მოძრაობის წევრი, ლევან ვარშალომიძე, ნიკა მელიას პარტიის თავმჯდომარის არჩევნებში გამარჯვებას ულოცავს. მილოცვას ვარშალომიძე საკუთარ Facebook გვერდზე ავრცელებს.
წინასწარი შედეგებით არჩევნებში, რომელიც Facebook-ის მეშვეობით ჩატარდა, ენმ-ს მხარდამჭერებმა პარტიის თავმჯდომარედ ნიკა მელია აირჩიეს. ელექტრონულ გამოკითხვაში 20 ათასზე მეტმა მოქალაქემ მიიღო მონაწილეობა.
ერთიანი ნაციონალური მოძრაობის ყოფილმა თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ განცხადება Facebook-ზე გამოაქვეყნა. ის ენმ-ს დატოვების მიზეზად ასახელებს "პარტიული სტრატეგიის არარსებობას", პარტიის გარშემო და შიგნით "ოდიოზური ფიგურების" გამოჩენას, "ელჩების წინააღმდეგ გაჩაღებული თავდასხმისა და შეურაცხყოფის კამპანიას" და "სხვა პრობლემებს".