21 ნოემბერს საქართველოში ფორმალურად 31 ოქტომბრის საპარლამენტო არჩევნების მეორე ტური ტარდება იმ 17 ოლქში, სადაც ვერცერთმა კანდიდატმა ბარიერის გადალახვა ვერ შეძლო. თუმცა, ყველა ოპოზიციურმა პარტიამ, რომლის კანდიდატსაც მეორე ტურებში უნდა მიეღო მონაწილეობა, არჩევნებს, ისევე, როგორც პარლამენტში შესვლას, ბოიკოტი გამოუცხადა.
ბოიკოტის მიზეზი ისაა, რომ არცერთი ოპოზიციური პარტია 31 ოქტომბერს ჩატარებული არჩევნების შედეგებს ლეგიტიმურად არ ცნობს და მიიჩნევს, რომ არჩევნები გაყალბებულია.
თავდაპირველად განიხილებოდა, რომ მეორე ტურის დროს ოპოზიციური პარტიები ორგანიზებას გაუწევდნენ აქციას, როგორც ეს არჩევნების შემდეგ ყოველ შაბათ დღეს ხდებოდა, თუმცა, 20 ნოემბერს ლიდერებმა მეორე ტურის სრული უგულებელყოფის გადაწყვეტილება მიიღეს.
ქართული ოცნება მხოლოდ საკუთარ თავს შეეჯიბრება შემდეგ 17 ოლქში:
- მთაწმინდა – ბექა ოდიშარია;
- ვაკე – ნოდარ ტურძელაძე;
- საბურთალო – დავით სერგეენკო;
- ისანი – კახა კახიშვილი;
- სამგორი – სოზარ სუბარი;
- დიდუბე-ჩუღურეთი – გია ვოლსკი;
- ნაძალადევი – მიხეილ ყაველაშვილი;
- გლდანი – ლევან კობიაშვილი;
- რუსთავი – ნინო ლაცაბიძე;
- მცხეთა-დუშეთი-თიანეთი-ყაზბეგი – შალვა კერესელიძე;
- ხაშური-ქარელი – ზაალ დუგლაძე;
- ზესტაფონი-ბაღდათი-თერჯოლა-ტყიბული – ბეჟან წაქაძე;
- ქუთაისი – ზაზა ლომინაძე;
- თელავი-ახმეტა-ყვარელი-ლაგოდეხი – ირაკლი ქადაგიშვილი;
- ზუგდიდი – ირაკლი ჩიქოვანი;
- ბათუმი – რესან კონცელიძე;
- ხულო-შუახევი-ქედა-ხელვაჩაური – ანზორ ბოლქვაძე.
საერთაშორისო გამჭვირვალობა – საქართველო (TI) 2020 წლის საპარლამენტო არჩევნების მე-2 ტურს არ დააკვირდება.
ცენტრალური საარჩევნო კომისიის ოფიციალური მონაცემების მიხედვით, ქართულმა ოცნებამ ხმების 48.22% მიიღო, ოპოზიციურ პარტიებზე კი ხმები ასე გადანაწილდა:
ერთიანი ნაციონალური მოძრაობა-ძალა ერთობაშია – 27.18%
ევროპული საქართველო – 3.79%
ლელო – 3.15%
სტრატეგია აღმაშენებელი – 3.15%
პატრიოტთა ალიანსი – 3.14%
გირჩი – 2.89%
მოქალაქეები – 1.33%
ლეიბორისტული პარტია – 1%
ადგილობრივი დამკვირვებლები კი არაერთ ხარვეზსა და დარღვევაზე მიუთითებდნენ. გამოქვეყნდა ISFED-ის (სამართლიანი არჩევნები) ხმების პარალელური დათვლის შედეგებიც, რომლის მიხედვითაც, ქართულმა ოცნებამ ხმების 45.8% მიიღო, ენმ-ძალა ერთობაშიამ – 26.4%, ევროპულმა საქართველომ – 3.7%. ცდომილების ხარისხი 0.7%-ია.
ამასთან, სამართლიანი არჩევნების შემაჯამებელი ანგარიშის მიხედვით დაფიქსირდა საარჩევნო უბნების 8%-ზე შემაჯამებელი ოქმების დისბალანსის შემთხვევები, რაც გულისხმობს ბიულეტენების ამომრჩეველთა ხელმოწერების რაოდენობაზე მეტობას.
"მიუხედავად იმისა, რომ ამ ტენდენციას, შესაძლოა, გარკვეული გავლენა მოეხდინა საარჩევნო სუბიექტების მიერ ნაჩვენებ შედეგებზე, PVT ანალიზი აჩვენებს, რომ შედეგებზე შესაძლო მაქსიმალური გავლენა იქნებოდა 4.1%-ზე ნაკლები". – წერდა ორგანიზაცია.
2020 წლის 31 ოქტომბერს ჩატარებულ საპარლამენტო არჩევნებს შედეგების გამოქვეყნებას ოპოზიცური პარტიებისა და ამომრჩევლების პროტესტი მოჰყვა. არჩევნების შედეგებს ყველა ოპოზიციურმა პარტიამ ბოიკოტი გამოუცხადა და არცერთი მათგანი საქართველოს მე-10 მოწვევის პარლამენტში არ შედის. მანდატებზე უარი თქვეს ევროპულმა საქართველომ, ლელომ, ლეიბორისტულმა პარტიამ, გირჩმა, ენმ-ძალა ერთობაშიამ, სტრატეგია აღმაშენებელმა, მოქალაქეებმა და პუტინისტურმა პატრიოტთა ალიანსმა.
ოპოზიციურმა პარტიებმა და არასამთავრობო ორგანიზაციებმა არჩევნების შედეგების გასაჩვრება სცადეს როგორც ცენტრალურ საარჩევნო კომისიაში, ასევე სასამართლოში.
არჩევნების შედეგების შემაჯამებელი ოქმები ოპოზიციამ და არასამთავრობო ორგანიზაციებმა გაასაჩივრეს. თბილისის საქალაქო სასამართლომ არცერთი სარჩელი არ დაუკმაყოფილა ერთიან ნაციონალურ მოძრაობას, ევროპულ საქართველოს, ლეიბორისტულ პარტიას, პარტიას დემოკრატიული მოძრაობა – ერთიან საქართველო.
13 ნოემბერს გამართულ შემაჯამებელი ოქმების გასაჩივრების სხდომაზე ცენტრალურმა საარჩევნო კომისიამ ოპოზიციური პარტიებისა და არასამთავრობო ორგანიზაცია ახალგაზრდა იურისტთა ასოციაციის არცერთი საჩივარი არ დააკმაყოფილა.
არასამთავრობო ორგანიზაცია საერთაშორისო გამჭვირვალობა - საქართველოს ინფორმაციით, 2020 წლის არჩევნებზე დარღვევებთან დაკავშირებით რაიონულმა სასამართლოებმა მათი სარჩელების 92.8% არ დააკმაყოფილეს, სააპელაციომ კი - 100%.
ყველა სიახლე იხილეთ ტაბულას პორტალზე – არჩევნები 2020.
