რუსეთში ბოლო 24 საათში კორონავირუსის 10 817 ახალი შემთხვევა დადასტურდა. ეპიდემიის გავრცელებიდან დღემდე, ვირუსული ინფექციით, ოფიციალური მონაცემებით, 198 676 ადამიანი დაინფიცირდა.
ამ ეტაპზე, აშშ-ის შემდეგ, რუსეთში COVID 19-ით ინფიცირების ყველაზე სწრაფად მზარდი მაჩვენებელია. კორონავირუსით ინფიცირებულების მაჩვენებლით ქვეყანა მსოფლიოში მე-5 ადგილზეა.
რუსეთის ხელისუფლების მიერ მოწოდებული ინფორმაციის მიხედვით, გასულ 24 საათში, ვირუსით 104 ადამიანი გარდაიცვალა, სულ კი გარდაცვლილთა რიცხვი 1 827-მდე გაიზარდა.
თითქმის ერთი კვირაა, რუსეთში კორონავირუსით ინფიცირებულთა რიცხვი ყოველდღიურად 10 000-ზე მეტით იზრდება.
მოსკოვის მერის, სერგეი სობიანინის, თქმით, მოსკოვში ახალი კორონავირუსით ინფიცირებულების რეალური რიცხვი 300 000-მდეა.
6 მაისს ახალი კორონავირუსი რუსეთის კულტურის მინისტრს, ოლღა ლიუბიმოვას, დაუდასტურდა. ინფიცირებულია რუსეთის პრემიერმინისტრი, მიხაილ მიშუსტინიც. ასევე, კორონავირუსი დაუდასტურდა რუსეთის მშენებლობის მინისტრს, ვლადიმერ იაკუშევსაც.