თბილისის ინფექციური საავადმყოფოს სამედიცინო დირექტორის, მარინა ეზუგბაიას თქმით, 1 პაციენტის ჯანმრთელობის მდგომარეობა, რომელსაც განსაკუთრებით მძიმედ აფასებდნენ, სამი დღის განმავლობაში სტაბილურია.
"7 მძიმე პაციენტზე ვლაპარაკობთ ბოლო ხანია - 2 პაციენტი განსაკუთრებით მძიმე. ერთი პაციენტი განსაკუთრებით მძიმედან უკვე სტაბილურია 3 დღის განმავლობაში. შეგვიძლია ვთქვათ, რომ ის უკვე განსაკუთრებით მძიმე არ არის, არის მძიმე პაციენტი, რომელთანაც უკვე დაიწყება მონიტორინგი ყველა მაჩვენებლის შეფასებით", - თქვა ეზუგბაიამ.
მარინა ეზუგბაიას თქმით, COVID-19-ისგან ჯამოჯანმრთელებული 52 ადამიანიდან 38 ინფექციური საავადმყოფოს პაციენტია.
მისივე ცნობით, გუშინ ინფექციურ საავადმყოფოში 14 ტესტი გაკეთდა - ყველა პასუხი უარყოფითია. დღეს კლინიკაში 7 პაციენტზე უნდა გაკეთდეს ტესტირება.
თბილისის ინფექციურ საავადმყოფოში 1 არასრულწლოვანი მკურნალობს, ეზუგბაიას ინფორმაციით, მისი ჯანმრთელობის მდგომარეობა დამაკმაყოფილებელია.
ჯანდაცვის სამინისტროს ინფორმაციით, სომხეთიდან კორონავირუსით ინფიცირებული 2 პაციენტი ჩამოიყვანეს. ეზუგბაიას ცნობით, მათი მათი მდგომარეობა სტაბილურია.
ქვეყანაში COVID-19-ის 227 შემთხვევაა დადასტურებული. მათგან 52 ადამიანი გამოჯანმრთელდა, 3 გარდაიცვალა.
30 მარტს მიღებული გადაწყვეტილებით, საქართველოში კარანტინი გამოცხადდა, 21:00 საათიდან 06:00 საათამდე - კომენდანტის საათი.
21 აპრილამდე ქვეყანაში საგანგებო მდგომარეობაა მოქმედებს. მანამდე, კარანტინის რეჟიმში ორი მუნიციპალიტეტი იყო - მარნეული და ბოლნისი.
