თბილისის ინფექციური საავადმყოფოს სამედიცნო დირექტორის, მარინა ეზუგბაიას თქმით, კლინიკა 3-მა პაციენტმა დატოვა. ისინი კორონავირუსისგან გამოჯანმრთელდნენ. მისივე ინფორმაციით, ამ ეტაპზე ინფექციურ საავადმყოფოში 36 ინფიცირებული პირი მკურნალობს.
ეზუგბაიას ცნობით, გერმანიიდან ჩამოყვანილ 15 პაციენტს კორონავირუსზე ტესტი ჩაუტარდათ - ყველა პასუხი უარყოფითია. მათ საკარანტინო სივრცეში გადაიყვანენ.
"2 დღეა, ახალი პაციენტი არ მიგვიღია. ბოლო ხანებში მხოლოდ 2 დადასტურებული პაციენტი გვყავს", - თქვა ეზუგბაიამ.
ექიმის თქმით, კლინიკაში 4 პირს მძიმე პნევმონია აქვს.
"3 იყო დღეს და შემოგვემატა. პროგრესირება წავიდა ერთ პაციენტთან. თუმცა, ეს პროგრესირება მძიმედ მიმდინარე არ არის და მართვადია. საშუალო და მსუბუქი პნევმონია თითქმის ყველა პაციენტთან ვლინდება", - თქვა ეზუგბაიამ.
თბილისის ინფექციურ საავადმყოფოში COVID-19-ით ინფიცირებული 80 წელს გადაცილებული ქალი მკურნალობს. მარინა ეზუგბაიას ინფორმაციით, მისი ჯანმრთელობის მდგომარეობა სტაბილურია.
"რაც, მგონი, სასიკეთო უნდა იყოს სამომავლოდ. მივდივართ სტაბილიზაციისკენ", - თქვა მან.
საქართველოში კორონავირუსით ინფიცირების 157 შემთხვევაა დადასტურებული, მათგან გამოჯანმრთელებულია 31 პირი. დღეს, 4 აპრილს, 1 ადამიანი - 79 წლის ქალი გარდაიცვალა.
30 მარტს მიღებული გადაწყვეტილებით, ქვეყანაში კარანტინი გამოცხადდა, 21:00 საათიდან 06:00 საათამდე - კომენდანტის საათი.
21 აპრილამდე ქვეყანაში საგანგებო მდგომარეობაა გამოცხადებული. მანამდე, კარანტინის რეჟიმში ორი მუნიციპალიტეტი, მარნეული და ბოლნისი იყო.
