ინფექციური საავადმყოფოს სამედიცინო დირექტორის მარინა ეზუგბაიას თქმით, დღის მეორე ნახევარში გამოვლენილი 3 ახალი შემთხვევიდან, 2 ინფექციური საავადმყოფოს ცენტრში დადასტურდა.
როგორც ეზუგბაია განმარტავს, პაციენტების ინფიცირების წყარო ცნობილია, ესაა ე.წ. ინგლისის კლასტერი. გუშინ, 29 მარტს, რიგით 91-ე პაციენტი ინგლისში მოგზაურობისას დაინფიცირდა. ეზუგბაიას განმარტების მიხედვით, 2 ახალი შემთხვევა სწორედ ამ პაციენტს უკავშირდება.
ინფექციური საავადმყოფოს სამედიცინო დირექტორის ცნობით, ახალი პაციენტების ჯანმრთელობის მდგომარეობა დამაკმაყოფილებელია.
კლინიკაში კვლავ რჩება 4 პრობლემური პაციენტი, რომელთაგან 2-ის მდგომარეობა კრიტიკულია, ხოლო 2-ს აქვს პნევმონიის მძიმე ფორმა.
30 მარტის საღამოს მონაცემებით, საქართველოში ახალი კორონავირუსის 100 დადასტურებული შემთხვევაა, აქედან 18 გამოჯანმრთელდა. კარანტინის რეჟიმში 4 978 პირი იმყოფება, ხოლო სტაციონარში მეთვალყურეობის ქვეშ - 266.