ჩრდილოეთ იტალიის რეგიონ ბერგამოში 19 მარტის მონაცემებით კორონავირუსით, სულ მცირე, 28 სასულიერო პირი გარდაიცვალა.
ინფორმაციას იტალიური გაზეთი, Avvenire ავრცელებს. მათი ინფორმაციით, კორონავირუსი კიდევ ორი სასულიერო პირის გარდაცვალების მიზეზი გახდა - ერთ შემთხვევაში სასულიერო პირი პნევმონიით გარდაიცვალა, მანამ, სანამ კორონავირუსი დაუდასტურდებოდა, მეორე შემთხვევაში გარდაცვლილს ქრონიკული დაავადება ჰქონდა.
ყველა მათგანი, გარდა სამისა, 70 წელზე მეტის იყო, ნახევარზე მეტი კი 80-ზე მეტის. ყველაზე ახალგაზრდა სასულიერო პირი, რომელიც კორონავირუსით გარდაიცვალა, 54 წლის იყო.
ბერგამოს ეპისკოპოსებს პაპი ფრანცისკე 18 მარტს შეხვდა.
"პაპი ფრანცისკე დაგვპირდა, რომ ჩვენთვის ყოველდღე ილოცებს", - თქვა ერთ-ერთმა ეპისკოპოსმა.
იტალიაში კორონავირუსით 53 578 ადამიანი დაინფიცირდა, გარდაიცვალა 4 825. 6 072 პირი გამოჯანმრთელდა.
