განათლების, მეცნიერების, კულტურისა და სპორტის სამინისტრო სკოლებში სასწავლო წლის დაწყებასთან დაკავშირებით ინფორმაციას ავრცელებს.
უწყებაში ამბობენ, რომ საგანმანათლებლო დაწესებულებებში სასწავლო პროცესი 16 სექტემბერს დაიწყება, 20-მდე სკოლაში კი, შესაძლოა, ორი კვირით გვიან.
"მიმდინარე სარეაბილიტაციო სამუშაოებიდან გამომდინარე, საქართველოს მასშტაბით სასწავლო პროცესის დაწყების თარიღმა ერთეულ შემთხვევებში (20-მდე სკოლაში) შესაძლოა ორი კვირით მხოლოდ გადაიწიოს. ასეთ სკოლებში, გაკვეთილები შესაბამისი საგაკვეთილო ცხრილით შაბათი დღის ხარჯზე ანაზღაურდება. აღნიშნულის შესახებ, მშობლების ინფორმირებას სამინისტროს ინსტრუქციის საფუძველზე, სკოლების ადმინისტრაცია უზრუნველყოფს", - ამბობენ უწყებაში.
ამასთან, სამინისტრო ავრცელებს ინფორმაციას სკოლების რეაბილიტაციის შესახებაც. უწყების ცნობით, რეაბილიტაცია მთელ საქართველოში, 700-მდე სკოლაში განხორციელდა.