ქართული ოცნების მიერ მხარდაჭერილმა კანდიდატმა სალომე ზურაბიშვილმა ხმების ყველაზე მაღალი პროცენტული რაოდენობა საჩხერეში აიღო. ზურაბიშვილმა საჩხერეში ხმების 77.08% დააგროვა. ხმების ყველაზე ნაკლები პროცეტული რაოდენობა 22.49% კი, საზღვარგარეთ გახსნილ უბნებზე აიღო.
ამ დროისათვის ცესკომ ხმები 99.95% დათვალა, რაც 3692 უბანია. მონაცემების მიხედვით, სალომე ზურაბიშვილმა ხმების 38,63% აიღო, გრიგოლ ვაშაძემ კი - 37,74%.
შედეგების მიხედვით საპრეზიდენტო არჩევნების მეორე ტური გაიმართება. ის ქართული ოცნების მხარდაჭერილ სალომე ზურაბიშვილსა და "ძალა ერთობაშიას" კანდიდატ გრიგოლ ვაშაძეს შორის შედგება, ვინაიდან არჩევნებში მონაწილე ვერც ერთმა სუბიექტმა ვერ დააგროვა ხმების 50%-ზე მეტი, პირველ და მეორე ადგილებს კი სწორედ ისინი იყოფენ.
2018 წლის საპრეზიდენტო არჩევნებზე მოსახლეობის აქტივობა 46.74% იყო. კენჭისყრაში მონაწილეობა სულ 1 637 956-მა ამომრჩეველმა მიიღო. ყველაზე მაღალი აქტივობა იყო ქედაში (64.74%), ხოლო ყველაზე დაბალი - მარნეულში (36.47%). რაც შეეხება თბილისს, ამომრჩევლის აქტივობამ 45.4% შეადგინა.
2018 წელს პრეზიდენტს პირდაპირი წესით ბოლოჯერ ვირჩევთ, ამასთან, გამონაკლისის სახით, 6 წლით. 2024 წელს, მას შემდეგ, რაც ახალი კონსტიტუცია ძალაში შევა და საპარლამენტო არჩევნებიც განახლებული სისტემით ჩატარდება, პრეზიდენტს 300 ადამიანისგან შემდგარი კომისია აირჩევს, რომელთაგანაც 150 წევრი დეპუტატი იქნება, დანარჩენი 150 კი - აკადემიური და პროფესიული წრეების წარმომადგენელი.
