პოლიციამ აქციის მონაწილეებს რუსთაველის გამზირის სრულად გადაკეტვის უფლება მისცა

 

თბილისში პარლამენტის ძველ შენობასთან შეკრებილ აქციის მონაწილეებს შინაგან საქმეთა სამინისტრომ რუსთაველის გამზირის სრულად გადაკეტვის უფლება მისცა. ამ წუთებში აქციის მონაწილეები გამზირის მთელ ტერიტორიას იკავებენ. აქციის ორგანიზატორებმა პოლიციას მადლობა გადაუხადეს მათი მოთხოვნის შესრულებისთვის.

"ეს არის პოლიცია სწორი ქმედება და არა ის, რაც გუშინ ჩაიდინეთ. ქალაქის ცენტრი პარალიზებულია. ის გვიკავია ჩვენ. ახლა ის დროა, მოვიდნენ ხელისუფლების წარმომადგენლები და გაგვცენ პასუხები", - განაცხადა ბექა წიქარიშვილმა.

პარლამენტის ძველ შენობასთან რამდენიმე ათასი ადამიანია შეკრებილი. მათ გარშემო პოლიციის კორდონია. სპეცრაზმი ქაშუეთის ეკლესიის ეზოში არის მობილიზებული. ამასთანავე გავრცელდა ვიდეოები, რომლებზეც ასახულია როგორ მიემართებიან ქალაქის ცენტრისკენ წყლის ჭავლის მანაქნები. თუმცა შსს სპეცტექნიკის მობილიზებას არ ადასტურებს. 

აქციის მონაწილეები წუხელ კლუბებში ჩატარებულ სპეცოპერაციასა და შემდეგ გამართული მხარდამჭერი აქციის დარბევას აპროტესტებენ. აქციის მონაწილეებს ოთხი მოთხოვნა აქვთ: პირველი - თანამდებობა დატოვოს პრემიერ-მინისტრმა გიორგი კვირიკაშვილმა; მეორე - გადადგეს შინაგან საქმეთა მინისტრი გიორგი გახარია; მესამე - დაისაჯოს ძალადობრივ ოპერაციაზე პასუხისმგებელი ყველა პირი; მეოთხე - დადგეს „ქართული ოცნების“ პოლიტიკური პასუხისმგებლობის საკითხი. 

სპეციალური დანიშნულების რაზმი კლუბებში ბასიანი და გალერი წუხელ გვიანღამით შეიჭრა. სპეცოპეაციების შემდეგ კი პოლიციამ კლუბების მსარდასაჭერად შეკრებილი ადამიანების აქცია დაარბია და აქციის მონაწილეები დააკავა.