რამდენიმე თვეში ჯეოსელის 1.7 მილიონი აბონენტი სილკნეტის აბონენტი გახდება. გარიგების შედეგად შეიქმნება კომპანია, რომელიც კომუნიკაციების ბაზრის პრაქტიკულად ყველა სფეროში იქნება წარმოდგენილი. ჯეოსელის გაყიდვას კომუნიკაციების კომისიის თანხმობა ესაჭიროება, რეგულატორმა საქმის განხილვისთვის სამთვიანი ვადა აიღო.
როგორ გადანაწილდება ბაზრის წილები ჯეოსელის გაყიდვის შემდგომ
დღეისთვის საქართველოს ყველაზე დიდი მობილური ოპერატორი არის მაგთი, რომელსაც 1.9 მილიონი აბონენტი ჰყავს, მეორე ადგილზე 1.7 მილიონი აბონენტით ჯეოსელია. სხვა ბაზრები, რომელზეც მაგთი და სილკნეტი არიან წარმოდგენილი შემდეგია: ინტერნეტის ბაზარი, საკაბელო ტელევიზია და ფიქსირებული სატელეფონო მომსახურება. ყველა ამ სერვისზე მაგთის 2.68 მილიონი აბონენტი ჰყავს, სილკნეტს (ჯეოსელის ჩათვლით) 2.52 მილიონი აბონენტი. შესაბამისად, ჯეოსელის შესყიდვის შემდეგ, სილკნეტის აბონენტების რაოდენობა მაგთიზე მცირე იქნება.
