ევროპის მოედანზე ბერლინის კედლის ფრაგმენტი დაიდგა. მთავრობის ცნობით, საჩუქარი საქართველოს პრემიერს 2017 წლის 16 ივნისს, გერმანიაში ვიზიტისას გადაეცა, როგორც ქართულ-გერმანული მეგობრობის სიმბოლო. გიორგი კვირიკაშვილმა გერმანელ ხალხსა და გერმანიის მთავრობას "ძალიან სიმბოლური და მნიშვნელოვანი საჩუქრისთვის" მადლობა გადაუხადა.
"ეს უმშვენიერესი ადგილი შეგვახსენებს, რომ ყველა ბოროტების კედელი ადრე თუ გვიან დაინგრევა. 2017 წელი გერმანია-საქართველოს წელია და გერმანელი ხალხის საჩუქარი ქართველ ხალხს ჩამოუვიდა საქართველოში იმის ნიშნად, რომ როგორც დასრულდა უდიდესი უსამართლობა გერმანელი ხალხის მიმართ და დაინგრა კედელი, რომელიც გერმანელ ხალხს ხელოვნურად ორად ჰყოფდა, ასევე საქართველოში ბოროტების მიერ აღმართული კედელი დაინგრევა და დაინგრევა ასევე მშვიდობიანად, ხაზს ვუსვამ, ვინაიდან ყოველთვის, როდესაც ცივილიზებული სამყარო ერთად დგება, მიზანმიმართული, სწორი ნაბიჯებით და გაბედული პოლიტიკით შესაძლებელია ასეთი შედეგის მიღწევა" - განაცხადა პრემიერმა.
ცერემონია დასრულდა კონცერტით, რომელზეც შესრულდა ცნობილი კომპოზიციები, რომლებიც ბერლინის კედელს მიეძღვნა ან ბერლინის კედლის ფონზე სრულდებოდა.