პარლამენტში შესულია 2018 წლის ბიუჯეტის პირველადი პროექტი, რომლის მიხედვითაც მთავრობა მომავალ წელს მეწველი ძროხების შესყიდვას გეგმავს. 120 ათას ლარად 20 მეწველ ფურს სოფლის მეურნეობის სამინისტრო "სათიბ-საძოვრების რაციონალურად გამოყენების სახელმწიფო პროგრამის" ფარგლებში ყიდულობს.
ერთ ძროხაში ბიუჯეტი 6 ათას ლარს გადაიხდის.
მეწველი ფურების შეძენის მუხლი, ბიუჯეტის პროექტი:
ფოტო: 2018 წლის ბიუჯეტის პროექტი
მთავრობის ინფორმაციით, "საძოვრების რაციონალურად ათვისების პროგრამაში", რაციონალურად და სწორად მოხდება სახელმწიფოს საკუთრებაში არსებული სათიბ-საძოვრების გამოყენება. ამ მიზნით, სასოფლო-სამეურნეო კოოპერატივებს, რომლების წევრთა რაოდენობა შეადგენს არანაკლებ 11 მეპაიეს და მფლობელობაში გააჩნიათ არანაკლებ 200 სული ფური ან/და დეკეული. იჯარით გადაეცემათ სათიბ-საძოვრები და შესაბამისი აღჭურვილობა - ტრაქტორები, სათიბები, ასევე სხვა საჭირო ინვენტარი. აღნიშნული პროექტი გიორგი კვირიკაშვილმა 2017 წლის 25 მაისს წარადგინა.
2018 წლის ბიუჯეტის პროექტის მიხედვით, სოფლის მეურნეობის სამინისტროს ბიუჯეტი 9 მილიონი ლარით, 266 მილიონ ლარამდე იზრდება.
