საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა 2012 წლის 1 ოქტომბრამდე გამოტანილი გამამტყუნებელი განაჩენების გადასინჯვა დაიწყო. პროკურატურის ინფორმაციით, საქართველოს პარლამენტმა გამამტყუნებელი განაჩენების გადასინჯვასთან დაკავშირებით კანონმდებლობაში ცვლილება შეიტანა და სწორედ აღნიშნული ცვლილების საფუძველზე, ახალმა დეპარტამენტმა სამი მსჯავრდებულის: იოსებ ჯანდიერის, თემურ სალაყაიას და ანდრო ჩხიკვიშვილის მიმართ, განაჩენის გადასინჯვის გადაწყვეტილება მიიღო. უწყების ცნობით, გადასინჯვის შედეგად დადგინდა, რომ გამოირიცხა ხსენებული პირების მიერ იმ დანაშაულის ჩადენის ფაქტი, რისთვისაც ისინი მსჯავრდებულები არიან.
"ჩატარებული გამოძიებით დადგენილია, რომ მოქალაქეები იოსებ ჯანდიერი, თემურ სალაყაია და ანდრო ჩხიკვიშვილი გასამართლდნენ და იხდიდნენ სასჯელს წინა ხელისუფლებისთვის მიუღებელი პოლიტიკური შეხედულებების და მათი უკანონო მოთხოვნების შეუსრულებლობის გამო. იოსებ ჯანდიერის მიმართ სისხლის სამართლებრივი დევნა მხოლოდ იმიტომ დაიწყო, რომ მან დემონსტრაციულად დატოვა პოლიტიკური პარტია "ერთიანი ნაციონალური მოძრაობა". 2003 წლიდან იოსებ ჯანდიერი მუშაობდა პოლიტიკურ პარტია "ერთიან ნაციონალურ მოძრაობაში" პარტიის საგანგებო სიტუაციების სწრაფი რეაგირების სამსახურის უფროსის თანამდებობაზე. 2007 წლის 4 ნოემბერს, პარლამენტის წინ მიმდინარე საპროტესტო აქციების დროს, მან დატოვა პარტიის რიგები და შეუერთდა აქციას, სადაც მან დემონსტრაციულად დახია პარტიული მოწმობა. ამ ფაქტიდან, რამდენიმე დღეში, 2007 წლის 13 ნოემბერს, მასთან სახლში შევიდნენ შსს სპეციალური ოპერატიული დეპარტამენტის თანამშრომლები, რომლებმაც საძინებელ ოთახში ჩაუდეს ნარკოტიკული საშუალება "ჰეროინი" და დააკავეს. თბილისის საქალაქო სასამართლოს 2008 წლის 10 მარტის განაჩენით იოსებ ჯანდიერი გაასამართლეს ცრუ ბრალდებით - ნარკოტიკული საშუალების შეძენა-შენახვისთვის და მას მიესაჯა 8 წლით თავისუფლების აღკვეთა. 2008 წლის 24 ნოემბერს, პრეზიდენტის შეწყალებით, ისე რომ მას ეს არ მოუთხოვია, მან დატოვა საპატიმრო დაწესებულება", - აღნიშნულია უწყების განცხადებაში.
პროკურატურის ცნობით, შსს-ს კონსტიტუციური უსაფრთხოების უსაფრთხოების დეპარტამენტის ყოფილი თანამშრომელი მხოლოდ იმიტომ დააკავეს, რომ იმდროინდელ ხელისუფლებას მის ქართულ ოცნებასთან კავშირზე ჰქონდა ეჭვი.
"მეორე მოქალაქე, რომლის განაჩენიც გადაისინჯება, გახლავთ შსს კონსტიტუციური უსაფრთხოების დეპარტამენტის ყოფილი თანამშრომელი თემურ სალაყაია, რომელიც მხოლოდ იმიტომ დააკავეს, რომ მის მიმართ ჰქონდათ ეჭვი პოლიტიკურ პარტია "ქართულ ოცნებასთან" კავშირის თაობაზე. კერძოდ, 2012 წლის 2 ივნისს, თემურ სალაყაია თავის მეუღლესთან ერთად ავტომანქანით საკუთარი სახლის მიმართულებით გადაადგილდებოდა, რა დროსაც იგი სამსახურიდან გამოიძახეს და ჭანტურიას ქუჩაზე, ეკონომიკის სამინისტროს მიმდებარე ტერიტორიაზე მისვლა სთხოვეს. ადგილზე, კონსტიტუციური უსაფრთხოების დეპარტამენტის და შსს ძველი თბილისის სამმართველოს თანამშრომლების ერთობლივი მოქმედებით მოხდა თემურ სალაყაიას დაკავების ინსცენირება, იმ საფუძვლით, რომ თითქოს მან უკანონოდ შეიძინა და ინახავდა ნარკოტიკულ საშუალება ჰეროინს. დაკავებული თემურ სალაყაია გადაიყვანეს შსს-ს ძველი თბილისის განყოფილებაში, სადაც მას სთხოვდნენ "ქართულ ოცნებასთან" თანამშრომლობის აღიარებას, რასაც დაკავებული კატეგორიულად უარყოფდა. 2012 წლის 4 ივნისს, მას წარედგინა ცრუ ბრალდება ნარკოტიკული საშუალების შეძენა, შენახვისთვის, აღკვეთის ღონისძიების სახით შეეფარდა პატიმრობა და შესახლებულ იქნა სასჯელაღსრულების დაწესებულებაში. საპატიმროდან მისი განთავისუფლება მხოლოდ 2012 წლის 5 ოქტომბერს, ხელისუფლების ცვლილების შემდეგ მოხერხდა", - ნათქვამია განცხადებაში.
უწყების ცნობით, გაყალბებული მტკიცებულების საფუძველზე ანდრო ჩხიკვიშვილმა 5 წელი გაატარა საპატიმრო დაწესებულეში.
"დაზარალებული მესამე მოქალაქეა ანდრო ჩხიკვიშვილი, რომელმაც ყალბი ექსპერტიზის დასკვნის საფუძველზე 5 წელი მოიხადა საპატიმროში. კერძოდ, ანდრო ჩხიკვიშვილი იყო შვეიცარიული კომპანიის წარმომადგენელი საქართველოში, რომლის მიმართაც საქართველოს ენერგეტიკის სამინისტროს გააჩნდა დავალიანება. 2006 წლის სექტემბერში ანდრო ჩხიკვიშვილი დაიბარეს საქართველოს გენერალურ პროკურატურაში და მოსთხოვეს შვეიცარიული კომპანიის წარმომადგენლების დარწმუნება, რათა მათ აღარ მოეთხოვათ ქართული მხარისგან მისაღები თანხა. აღნიშნულ მოთხოვნაზე უარის მიღების შემდეგ, ანდრო ჩხიკვიშვილი 2006 წლის 18 ოქტომბერს დააკავეს თაღლითობის ცრუ ბრალდებით, რასაც საფუძვლად დაედო ლ. სამხარაულის სახელობის ექსპერტიზის ეროვნული ბიუროს ყოფილი ექსპერტის ნუგზარ ბელქანიას მიერ შედგენილი ყალბი დასკვნა. თბილისის საქალაქო სასამართლოს 2007 წლის 4 ივლისის განაჩენით იგი ცნობილ იქნა დამნაშავედ სსკ-ის 180-ე მუხლით. გაყალბებული მტკიცებულების საფუძველზე ანდრო ჩხიკვიშვილმა 5 წელი გაატარა საპატიმრო დაწესებულებაში", - აღნიშნულია განცხადებაში.
პროკურატურის ინფორმაციით, უკანონოდ გასამართლებული პირების განაჩენების გადასინჯვის და მათი დარღვეული უფლებების აღდგენის პროცესს შეუქცევადი ხასიათი ექნება.
