მედიის განვითარების ფონდის კვლევის თანახმად, საქართველოს მთავრობის ცალკეული უწყებები 2015 წელსაც აგრძელებდნენ ისეთ მედიებთან სერვის კონტრაქტების გაფორმებას, რომელთა სარედაქციო პოლიტიკა ქსენოფობიას, ჰომოფობიას და ანტიდასავლურ განწყობებს ეფუძნება. ანგარიშის თანახმად, ესენია მედია-კავშირი ობიექტივი, გაზეთები "საქართველოს რესპუბლიკა", "ალია", "კვირის ქრონიკა" და "ასავალ-დასავალი". ამ კატეგორიაში დამატებით ორი ახალი ონლაინ გამოცემა Newspress.ge და ექსკლუზივ-ნიუსი მოხვდა. მედიის განვითარების ფონდი აღნიშნავს, რომ ანტიდასავლური განწყობების გაღვივებას Newspress.ge ირიბად, რუსულენოვანი პროპაგანდისტული პლატფორმების, მათ შორის სპუტნიკ-საქართველოს ტირაჟირების გზით ახდენს. მან 2015 წელს ბიუჯეტიდან 23 371 ლარის დაფინანსება მიიღო, ხოლო 2016 წელს - 28 941 ლარი.
მედიის განვითარების ფონდის ანგარიშის თანახმად, 2015 წელს ბიუჯეტიდან ყველაზე მეტი თანხა მიიღო საქართველოს რესპუბლიკამ (85 916 ლარი). მეორე ადგილს ობიექტივი (ეტალონი) იკავებს - 68 616 ლარი. მათ მოსდევს ალია და კვირის ქრონიკა - 21 816 ლარი, Newspress.ge - 23 371 ლარი, ექსკლუზივნიუსი 4 730 ლარი და ასავალ-დასავალი - 2 500 ლარი.
აღსანიშნავია, რომ 2015 წლის 7 ივლისს მედიის განვითარების ფონდმა გამოაქვეყნა კვლევა, რომელიც 2013-2014 წლებში იმ მედიასთან სერვის კონტრაქტების გაფორმების მიზანშოწონილობას ეხებოდა, რომელთა სარედაქციო პოლიტიკის შემადგენელი სიძულვილის ენის და ანტი-დასავლური განწყობების გაღვივებაა. MDF-ის კვლევის მიგნებები აისახა ევროპის საბჭოს რასიზმისა და შეუწყნარებლობის წინააღმდეგ ევროპის კომისიის (ECRI) მეხუთე ციკლის ანგარიშში საქართველოს შესახებ.
"კომისია მოუწოდებს საქართველოს ხელისუფლებას, გადახედოს კონტრაქტებს მსგავსი ტიპის მედიასთან. კერძოდ: "ECRI იძლევა რეკომენდაციას, რომ ხელისუფლებამ გადახედოს მის კონტრაქტებს მედიასთან და გააუქმოს, ან განაახლოს ისინი, თუ მედია შეიმჩნევა რასისტულ ან ჰომო/ტრანსფობიულ სიძულვილის ენის გამოვლენაში. ხელისუფლებამ ასევე უნდა უზრუნველყოს, რომ მომავალი კონტრაქტები შეიცავდნენ დათქმას კონტრაქტის გაუქმების შესახებ, თუკი მედიაში გამოვლინდება რასისტული ან ჰომო/ტრანსფობიური სიძულვილის ენა" - წერს მედიის განვითარების ფონდი და აღნიშნავს, რომ ეს რეკომენდაცია მედიასთან გაფორმებულ კონტრაქტებში არ ასახულა.