შინაგან საქმეთა სამინისტროს მიერ გამოქვეყნებული დანაშაულის სტატისტიკის მიხედვით, 2015 წლის პირველ კვარტალში წინა წლის ანალოგიურ პერიოდთან შედარებით, 500%-ით გაიზარდა ტერორიზმის შემთხვევები. გასული წლის იანვარ-მარტში ტერორიზმის არც ერთი ფაქტი არ დაფიქსირებულა, წელს კი, შსს-მ ხუთი შემთხვევა დაარეგისტრირა და მხოლოდ ერთი გახსნა.
შინაგან საქმეთა სამინისტრომ დანაშაულის სტატისტიკა დღეს გამოაქვეყნა. შსს-ს მონაცემებით, 2015 წლის იანვარ-მარტში დანაშაული წინა წლის ანალოგიურ პერიოდთან შედარებით, 15.24%-ით შემცირდა. კერძოდ, 2015 წლის პირველ კვარტალში დანაშაულის 8 970 ფაქტი დაფიქსირდა, 2014 წლის იანვარ-მარტში კი - 10 583.
შსს-ს მტკიცებით, შემცირდა განზრახ მკვლელობის, მკვლელობის მცდელობის, ჯანმრთელობის განზრახ დაზიანების შემთხვევები. ასევე დანაშაული საკუთრების წინააღმდეგ, მათ შორის, ქურდობა, ძარცვა და ყაჩაღობა. ასევე, ხულიგნობა, იარაღის უკანონო ტარება და ნარკოდანაშაული.
