პარტია თავისუფალი დემოკრატების განცხადებით, მათ პირველებმა დააყენეს მთავრობის პასუხისმგებლობის საკითხი, "მაგრამ ეს სრულებითაც არ ნიშნავს, რომ დაუფიქრებლად შევუერთდებით ნებისმიერ პროცესს თუ პროცედურას." ისინი თვლიან, რომ მთავრობა უნდა შეიცვალოს და ამის გადაწყვეტილება თავად მმართველმა ძალამ უნდა მიიღოს. პარტიამ განცხადება დღევანდელ აქციასთან დაკავშირებით გაავრცელა.
"ჯერ კიდევ აჭარაში განვითარებულმა მოვლენებმა ნათლად აჩვენა, რომ თავისუფალი დემოკრატების სიტყვას აქვს ერთ-ერთი გადამწყვეტი მნიშვნელობა ქვეყანაში არსებული პოლიტიკური პროცესების განვითარების თვალსაზრისით. ჩვენი პოლიტიკური ძალა არის ორიენტირებული პრობლემების მოგვარებაზე, პროგრესსა და სტაბილურობაზე. სამწუხაროდ, დღევანდელ ხელისუფლებას არ შესწევს ამ ყველაფრის უზრუნველყოფის უნარი. ამიტომაც ჩვენ, "თავისუფალმა დემოკრატებმა" პირველებმა დავაყენეთ მთავრობის პასუხისმგებლობის საკითხი, მაგრამ ეს სრულებითაც არ ნიშნავს, რომ დაუფიქრებლად შევუერთდებით ნებისმიერ პროცესს თუ პროცედურას. მთავრობა უნდა შეიცვალოს და ამის თაობაზე გადაწყვეტილება თავად მმართველმა ძალამ უნდა მიიღოს, უმოკლეს დროში", - წერია განცხადებაში.
