სასჯელაღსრულების სამინისტროს საგამოძიებო დეპარტამენტმა სამსახურებრივი უფლებამოსილების ბოროტად გამოყენების ბრალდებით, რუსთავის ციხის დირექტორი გიორგი ელიზბარაშვილი დააკავა. ამის შესახებ სამინისტროში გამართულ ბრიფინგზე გახდა ცნობილი.
"1-ელ იანვარს სასჯელაღსრულების მე-17 დაწესებულებაში ადგილი ჰქონდა მსჯავრდებულთა მხრიდან ასევე მსჯავრდებულებზე ძალადობის შემთხვევას. შვიდი მსჯავრდებულის მიმართ დაიწყო სისხლის სამართლებრივი დევნა. ისინი პასუხისგებაში მიეცნენ სსკ-ის 144-ე მუხლის მეორე ნაწილით. ასევე გაცნობებთ, რომ მოცემულ ფაქტთან დაკავშირებით სამსახურებრივი უფლებამოსილების ბოროტად გამოყენების ბრალდებით დაკავებულია მე-17 დაწესებულების დირექტორი. საქმეზე გამოძიება გრძელდება სსკ-ის 332-ე და 144-ე მუხლებით, ინციდენტში მონაწილე ყველა პირი კანონის მთელი სიმკაცრით დაისჯება", - აცხადებენ სასჯელაღსრულების სამინისტროში.
სამინისტროს განცხადებაში არ არის განმარტებული, კონკრეტულად რატომ ედავებიან სამსახურებრივი უფლებამოსილების ბოროტად გამოყენებას. აღსანიშნავია, რომ ბრიფინგამდე გავრცელდა ინფორმაცია, სადაც ციხის დირექტორს პატიმრის წამებაში ადანაშაულებდნენ.