პეტრიაშვილი: ეს რეალობას აცდენილი, გამწარებული, გაცხარებული კაცის განცხადებაა

ჩვენი, ჩემი კოლეგების და მეგობრების დადანაშაულება იმაში, რომ ნაციონალური მოძრაობის ლობირებას ვახდენდით, რეალობას აცდენილი კაცის, უფრო გამწარებული, გაცხარებული კაცის განცხადებაა. ის, რომ საქართველოს ხელისუფლებას 2 წლის განმავლობაში პროდასავლური, ევროპაზე და ევროატლანტიკაზე ორიენტირებული ხელისუფლების იმიჯი შეექმნა, ამაში რომ ირაკლი ალასანიას, მაია ფანჯიკიძის, დავით ზალკალიანის, სხვა ჩვენი კოლეგების წვლილი ძალიან დიდია, გადამწყვეტიც, მინდა ვთქვა - ამას მე კი არ ვსაუბრობ, მე კი არ მჭირდება ამაზე საუბარი, ამაზე საუბრობს მთელი საერთშორისო თანამეგობრობა. აქამდე თუ არ იყო ეს შეკითხვები, დღეს რომ ჩნდება, ეს, როგორც ბატონმა ბიძინამ დაადასტურა, პოლიტიკური სიმწიფის ნაკლებობის პრობლემაა.