ახალგაზრდა იურისტთა ასოციაცია სასჯელაღსრულების #8 დაწესებულებაში სავარაუდოდ, ე.წ. მაყურებლების არსებობასთან დაკავშირებით პროკურატურას და სასჯელაღსრულების სამინისტროს მიმართავს. ორგანიზაციის განცხადებით, 2014 წლის 15 ივლისს, სასჯელაღსრულების #8 დაწესებულებაში მოთავსებულმა პატიმარმა შავლეგ გურგენიძემ საია-ს ადვოკატს მიაწოდა ინფორმაცია, რომელიც სავარაუდოდ დანაშაულის ნიშნებს შეიცავს და დროულ რეაგირებას საჭიროებს.
“შავლეგ გურგენიძე საია-სათვის მიცემულ ახსნა-განმარტებაში უთითებს მე-8 დაწესებულების “ა” კორპუსში მყოფ ორ პიროვნებაზე, რომლებსაც მისჯილი აქვთ უვადო თავისუფლების აღკვეთა და სავარაუდოდ ე.წ. მაყურებლებს წარმოადგენენ. შავლეგ გურგენიძის განმარტებით, აღნიშნული პირები არიან “თემური და ოთარი (ერთ-ერთი გვარად არის ლოლუა). ეს პირები ზეწოლას ახდენენ სხვა პატიმრებზე. “თემური და ოთარი სასჯელაღსრულების დაწესებულების ტერიტორიაზე გადაადგილდებიან თავისუფლად, სხვა პატიმრებს სთხოვენ ტელეფონის ბარათს, სიგარეტის და სხვადასხვა პროდუქტების ყიდვას. თუ რომელიმე პატიმარი არ შეასრულებს მათ მითითებას, ოთარის ან/და თემურის მითითებით ადმინისტრაციის თანამშრომლებს გადაყავთ სხვა კორპუსში”, - აცხადებს შავლეგ გურგენიძე და უთითებს, რომ ისიც რამდენჯერმე გახდა იძულებული მათი მოთხოვნები შეესრულებინა. გურგენიძის განმარტებით, დასახელებულ პირებს მფარველობს #8 დაწესებულების დირექტორის მოადგილე უსაფრთხოების დარგში, ვინმე ილო”, - ნათქვამია საიას განცხადებაში.
როგორც ორგანიზაციაში აღნიშნავენ, ამავე განცხადებაში შავლეგ გურგენიძე მიუთითებს, რომ “თუ პატიმარი ითხოვს ექიმთან შეხვედრას და ეძახის დაწესებულების თანამშრომლებს, მსჯავრდებულები ოთარი ან/და თემური აგინებენ მსჯავრდებულს, უყვირიან და შემდეგ ადმინისტრაციის თანამშრომლებს აძლევენ მითითებებს, რომ მსჯავრდებული გადაიყვანონ სხვა კორპუსზე, რასაც ადმინისტრაციის თანამშრომლები ასრულებენ და მსჯავრდებული გადაყავთ სხვა კორპუსზე”.
საია მიიჩნევს, რომ დასახელებული ფაქტები დაუყოვნებლივ შესწავლას მოითხოვს.
"დაუშვებელია სასჯელაღსრულების დაწესებულებაში კონკრეტული პატიმრების მხრიდან გავლენის მოპოვების და ციხის ადმინისტრაციის საქმიანობაში მათი ჩარევის პრაქტიკის არსებობა, მით უმეტეს, თუ ამის შედეგად სხვა პატიმრების უფლებები ირღვევა. საია მოუწოდებს საქართველოს მთავარ პროკურატურასა და სასჯელაღსრულებისა და პრობაციის სამინისტროს, საკუთარი კომპეტენციების ფარგლებში შეისწავლონ მითითებული ინფორმაცია და მისი დადასტურების შემთხვევაში ყველა შესაბამის პირს კანონით გათვალისწინებული პასუხისმგებლობა დაეკისროს”, - ნათქვამია ორგანიზაციის განცხადებაში.
