NDI: ხათუნა გოგალაძის საქმიანობას დადებითად ყველაზე ცოტა ადამიანი აფასებს

NDI-ის კვლევის მიხედვით, მინისტრებს შორის ყველაზე დაბალი რეიტინგი გარემოს დაცვის მინისტრს ხათუნა გოგალაძეს აქვს.

გოგალაძის საქმიანობას გამოკითხულთა 16% დადებითად აფასებს, 37% მისი საქმიანობის მიმართ ნეიტრალურადაა განწყობილი, 6%-ს არ მოსწონს, რასაც გარემოს დაცვის მინისტრი აკეთებს, 35%-მა კი საერთოდ არ იცის მისი საქმიანობის შესახებ.

ლტოლვილთა და განსახლების მინისტრის დავით დარახველიძის საქმიანობით გამოკითხულთა 20%-ია კმაყოფილი, 7% მის საქმიანობას უარყოფითად აფასებს, ხოლო 29%-მა არაფერი იცის მისი საქმიანობის შესახებ. 

რეინტეგრაციის საკითხებში სახელმწიფო მინისტრის პაატა ზაქარეიშვილის საქმიანობას 19% აფასებს დადებითად, 37%-ის აზრით, მინისტრი საშუალოდ მუშაობს, ხოლო 6% უარყოფითად უყურებს მის საქმიანობას.

NDI-ის კვლევის საველე სამუშაოები ჩატარდა 13-27 ნოემბრის პერიოდში. საქართველოს მასშტაბით 3,915 ადამიანი პირისპირ ინტერვიუს წარმომადგენლობითი შერჩევის საფუძველზე გამოიკითხა.

NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (SIDA) და ატარებს კავკასიის კვლევითი რესურსების ცენტრი (CRRC).