საპარლამენტო უმრავლესობის წევრი ირაკლი სესიაშვილი დარწმუნებულია, რომ შს მომავალი მინისტრი ალექსანდრე ჭიკაიძე დაკისრებულ მოვალეობას თავს ღირსეულად გაართმევს. როგორც სესიაშვილმა კოალიცია ქართული ოცნების ოფისში ჟურნალისტებთან საუბრისას განაცხადა, მოხარულია, რომ შსს-ს სათავეში ახალგაზრდა, პერსპექტიული ადამიანი ჩაუდგება. მისივე თქმით, ალექსანდრე ჭიკაიძემ სისტემაში მუშაობა ნულიდან დაიწყო.
"მან ყველა ეტაპზე დაამტკიცა, რომ აქვს ძალიან მაღალი პროფესიონალიზმი და უნარ-ჩვევები, რათა სისტემა დაელაგებინა და ეფექტურად ემართა. ალექსანდრე ჭიკაიძე კახეთის სამმართველოს უფროსი გახლდათ. მე მასთან არაერთხელ მქონია ურთიერთობა და არ ყოფილა შემთხვევა, რომ სიტუაციის მიხედვით ეფექტურად არ ემოქმედა", - აღნიშნა ირაკლი სესიაშვილმა.
შინაგან საქმეთა მინისტრის პოსტზე ირაკლი ღარიბაშვილს თბილისის მთავარი სამმართველოს უფროსი ალექსანდრე ჭიკაიძე შეცვლის. ამის შესახებ სამინისტროში გამართულ ბრიფინგზე, თავად მომავალმა პრემიერმა განაცხადა.
